Андижон шаҳрида ички ишлар ходимлари ва аҳолига 30 минг дона тиббий ниқоб тарқатилди. «Дарё» мухбири Умиджон Мамарасуловнинг хабар беришича, бу тадбир Андижон вилояти ИИБ ташаббуси билан ўтказилган.
Тиббиёт ниқоблари ва гигиеник воситалар Андижон шаҳридаги жамоат жойларида, бозорлар ва вокзалда хизмат олиб бораётган йўл-патруль хизмати ва патруль-пост хизмати ходимларига тарқатилган.
Шунингдек, карантин вақтида аҳолига намунали транспорт хизматини кўрсатиб келаётган ҳайдовчиларга, шунингдек, аҳоли вакилларига ҳам тиббиёт ниқоблари бепул тақдим этилган.
Яқин кунларда профилактика инспекторлари ҳамда миграция ва фуқароликни расмийлаштириш бошқармаси ходимларига ҳам яна 20 минг дона тиббиёт ниқоби, 500 дона гигиеник восита тарқатилиши кутилмоқда.
Маълумот учун, 24 март куни соат 21:00 ҳолатига кўра, Ўзбекистонда 50 киши коронавирус инфекциясини юқтириб олган. Коронавирус тарқалишининг олдини олиш мақсадида мамлакат бўйлаб кенг миқёсли чоралар кўрилмоқда.
Хусусан, водий вилоятларидан Қамчиқ довони орқали Ўзбекистоннинг қолган ҳудудларига чиқиш тақиқланди. Вилоятлар чегараларида, хусусан, Андижон вилоятига кириш йўлларида постлар вақтинча тикланди. 25 мартдан бошлаб жамоат жойида тиббий ниқобсиз юрган шахслар жавобгарликка тортилади.
Мавзуга доир:
- Андижонлик 14 киши коронавирусга чалинган аёл билан Франциядан бир самолётда қайтганлиги ҳақидаги хабар рад этилди
- Андижонлик тадбиркор кунига 20 минг дона тиббиёт ниқоби тайёрлаб, дорихоналарга 900 сўмдан етказиб бермоқда
- Фарғоналик тадбиркор кунига 40 минг дона тиббий ниқоб тайёрлаб, дорихоналарга 400 сўмдан етказиб бермоқда
- Фарғоналик тадбиркор томонидан 30 млн сўмлик озиқ-овқат маҳсулотлари, тиббий ниқоб ва шахсий гигиена воситалари бепул тарқатилди
Изоҳ (0)