Ўзбекистонда Аи-91, Аи-92 ва Аи-95 маркали бензинларнинг нархи 200 сўм ёки 3 фоизга пасайиши кутилмоқда. Бу ҳақда, нефть ва газ соҳасидаги манбага асосланиб, «Gazeta.uz» хабар бермоқда.
Янги нархлар 29 мартга қадар (бошқа манбаларга кўра, 25 март куни) эълон қилиниши кутилмоқда. Манбанинг қайд этишича, «Ўзбекнефтгаз» компанияси ёқилғининг аҳоли учун хамёнбоплигини ошириш мақсадида шундай қарор қабул қилган. Айни вақтда, келгусида нархларга коронавирус инфекциясининг тарқалиши оқибатида истеъмолчиларнинг ёқилғига бўлган эҳтиёжининг ўзгариши ҳам таъсир кўрсатиши мумкинлиги таъкидланмоқда.
Ёқилғи нархининг келгусида эҳтимолий пасайишига таъсир қилувчи яна бир омил — таклифнинг талаб ҳажмидан ортиб кетгани. Давлат статистика қўмитаси маълумотларига кўра, 2020 йилнинг январь—февраль ойларида автобензин ишлаб чиқариш ҳажми 2019 йилнинг шу даврга нисбатан 25,5 фоизга — 151,6 минг тоннадан 190,3 минг тоннагача ошган. Талаб эса, аксинча, нисбатан паст суръатда ўсмоқда.
Ҳозирги кунда Аи-80 маркали бензин нархи 4500 сўм, Аи-91 — 5800 сўм, Аи-92 — 6200 сўм, Аи-95 эса 6 585 сўм. Манбанинг қайд этишича, Аи-80 маркали энг арзон бензин нархи ўзгаришсиз қолиши кутилмоқда. Манбанинг қўшимча қилишича, апрель ойида дизель ва ЭКО дизель ёқилғиларининг нархи ҳам пасайтирилиши мумкин. Олдинроқ импорт қилинадиган дизель нархи 7500 сўмдан 7300 сўмга пасайган эди.
Ўзбекистонда автомобиль бензини (Аи-80, Аи-91, Аи-92 ва Аи-95) ва дизель ёқилғиси Фарғона ва Бухоро нефтни қайта ишлаш заводларида ишлаб чиқарилади.
Олдинроқ ҳукумат томонидан Фарғона нефтни қайта ишлаш заводига мустақил равишда ўз маҳсулотларининг (Аи-80, Аи-91, Аи-92 бензинлари, Б-92, мазут, дизель ёқилғиси, мотор мойлари, битум ва бошқалар) нархларини белгилаш ҳуқуқи берилган эди. Бундан ташқари, Индонезияда рўйхатдан ўтказилган PT Trans Asia Resources компанияси билан ушбу заводнинг сотуви борасида келишув имзоланган.
Мавзуга доир: Ўзбекистонда Аи-91 бензини нархи эркин бўлади
Изоҳ (0)