Парламент қуйи палатасининг навбатдаги мажлисида Олий Мажлис Қонунчилик палатасининг Оила ва аёллар масалалари бўйича комиссияси тузилди. Бу ҳақда Парламент матбуот хизмати хабар берди.
Қайд этилишича, бу жамиятда оиланинг ўрнини янада мустаҳкамлаш ва унинг аҳамиятини ошириш, оналик ва болаликни муҳофаза қилиш, гендер тенглигини таъминлаш, соҳага оид қонун ҳужжатларини такомиллаштириш, ушбу йўналишдаги дастурларини ҳаётга изчил татбиқ этиш, оила ва хотин-қизлар масалаларига оид Ўзбекистон Республикаси халқаро шартномаларининг бажарилишини таъминлашга кўмаклашиш мақсадида амалга оширилди.
Мажлисда комиссия раиси ва таркиби сайланди. Комиссияга Ўзбекистон Республикаси Олий Мажлиси Қонунчилик палатасининг Фуқароларнинг соғлиғини сақлаш масалалари қўмитаси раиси ўринбосари Мақсуда Ворисова раис этиб сайланди.
Комиссия ўз фаолиятида жойларда ўтказилган назорат-таҳлил тадбирлари ва ўрганишлар давомида оила ва хотин-қизлар масалаларига оид қонун ҳужжатларида аниқланган бўшлиқ, камчилик ва муаммоларни таҳлил қилиб бориш, шу асосда тегишли давлат ҳокимияти ва бошқаруви органлари, нодавлат нотижорат ташкилотларига оила, хотин-қизларга оид масалалар бўйича аниқланган қонун бузилишлари ҳамда уларга имкон берувчи сабаблар ҳамда шарт-шароитларни бартараф этиш юзасидан тавсиялар киритади.
Шунингдек, оилани мустаҳкамлашга, оналик, оталик ва болаликни муҳофаза қилишга, аёлларнинг ҳуқуқлари, эркинликлари, қонуний манфаатларини таъминлашга, уларнинг жамиятдаги ўрни ва нуфузини оширишга, ижтимоий, иқтисодий, сиёсий, ҳуқуқий ва маданий ҳаётда аёлларнинг иштирокини янада фаоллаштиришга қаратилган давлат сиёсатини амалга оширишда иштирок этади.
Мавзуга доир:
- Сенатнинг видеоконференсалоқа шаклида ўтказилаётган 3-ялпи мажлисида Тупроққалъа туманини ташкил этиш масаласи кўриб чиқилади
- «Ҳозир парламент аъзоларидан фаоллик, масъулият талаб қилинади». Танзила Норбоева Ўзбекистонда коронавирусга қарши кураш ҳақида
- Жамшид Қўчқоров парламентда Инқирозга қарши чоралар дастури бўйича ахборот берди
Изоҳ (0)