Қирғизистоннинг Сузоқ туманида коронавирус билан касалланиш бўйича учта ҳолат қайд этилди. Бу ҳақда 18 март куни мамлакат соғлиқни сақлаш вазири Космосбек Чолпонбаевга таяниб, Akipress хабар берди.
Фото: Akipress
Гап Умра зиёрати учун Саудия Арабистонига бориб келган уч нафар Қирғизистон фуқароси ҳақида кетмоқда. Мамлакат коронавирусга текшириладиган давлатлар қаторига киритилмаган эди.
12 март куни улар Қирғизистонга қайтиб келган ва улардан таҳлил намуналари олинган. Зиёратчилар шифокорлар назорати остида карантинда сақланаётган эди.
16 март куни Умрадан қайтган Сузоқ тумани Благовешенка қишлоғида истиқомат қилувчи аёлнинг тана ҳарорати кўтарилиб кетган. У шифохонага олиб келиниб, таҳлил натижалари олиниб, Ўш вилоятига юборилган. Аёл билан биргаликда Саудия Арабистонидан 8 киши келган, уларнинг 3 нафарида коронавирус аниқланган.
Вазирнинг сўзларига кўра, шифокорлар аёлларнинг яқинларидан ҳам текширув учун таҳлил намуналарини олган. Тадқиқотлар биринчи босқичда Ўш вилоятидаги лабораторияда ўтказилган. Шундан сўнг, барча таҳлил натижалари Бишкекка юборилган ва у ерда коронавирус тасдиқланган.
Аввалроқ Қирғизистонда 16 мартдан бошлаб барча мактаблар ва олий таълим муассасалари 3 ҳафтага карантинга ёпилиши ҳақида хабар берилганди. Шунингдек, Қирғизистон ҳукумати коронавирус қайд этилган давлатларга борган хорижликларнинг мамлакатга киришини тақиқлаб қўйган.
Мавзуга доир:
Эслатиб ўтамиз, коронавирус тарқалгани сабабли Uzbekistan Airways 27 февралдан бошлаб Тошкентдан Жидда ва Мадинага бўлган барча қатновларни вақтинчалик тўхтатган. 15 март куни эса Ўзбекистонда коронавирусга чалиниш билан боғлиқ биринчи ҳолат қайд этилди. Ҳозирда Ўзбекистонда 11 кишида коронавирус аниқланган. Қозоғистонда эса касалликка чалинганлар сони олти нафарни ташкил этмоқда.
