Москва маъмурияти 20 мартга қадар коронавирус билан касалланганлар сони кескин ортса, қатъий карантин жорий этишни режалаштирмоқда, деб ёзади «РБК».
Кўрилиши мумкин бўлган қатъий чораларга кўра, фаолияти шаҳар ҳаётини таъминлашга таъсир кўрсатмайдиган корхоналар ишчилари уйдан ишлашга ўтиши мумкин. Барча давлат хизматлари онлайн-форматда кўрсатилади.
Шунингдек, шаҳар мэрияси бар, ресторан ва кўнгилочар савдо марказлари фаолиятини чеклаш имкониятини ҳам кўриб чиқмоқда. Энг қатъий чора сифатида эса жамоат транспорти фаолияти ҳам тўхтатилиши мумкин.
Аввалроқ Москва мэри Сергей Собянин коронавирус тарқалишига қарши кураш чоралари доирасида ўқувчилар ота-оналарининг ихтиёрига кўра 16 мартдан бошлаб пойтахтдаги мактабларга келиш-келмасликни эркин ҳал қилиш имконини берувчи қарорни имзолаган эди.
Жаҳон соғлиқни сақлаш ташкилоти маълумотларига кўра, охирги бир сутка давомида бутун дунёда коронавирус юқтириш бўйича 13 903 та ҳолат кузатилган. Шу тариқа, бутун дунёда коронавирус пандемияси бошланганидан бери COVID-19 билан касалланган одамлар сони 167 511 нафар етди.
Аввалроқ Украинада коронавирус туфайли поезд, автобус ва метро қатновлари тўхтатилгани ҳақида хабар берилган эди.
Изоҳ (0)