Ўзбекистонда карантин туфайли эълон қилинган таътил фақат боғча тарбияланувчилари, мактаб ўқувчилари ва олий таълим муассасалари талабаларига тааллуқли. Адлия вазири ўринбосари Акбар Тошқуловнинг таъкидлашича, иш берувчи ва мутасадди вазирликнинг буйруғи чиққан тақдирдагина тарбиячи ва ўқитувчилар ҳам таътилга чиқиши мумкин, унгача улар хизмат вазифаларини бажариши шарт.
Унинг сўзларига кўра, ходимларга таътил бериш масаласи қонунчиликда белгиланган тартибда амалга оширилиши керак.
Мавзуга доир: Ўзбекистонда коронавирус аниқланди, Наврўз бекор қилинди, мактаб ва боғчалар таътилга чиқди. Асосий маълумотлар
Вазирнинг қайд этишича, давлат идоралари ёки таълим муассасаларининг ходимларига таътил белгилангани йўқ.
«Мажбурий таътил бериш ҳолатлари, яъни ходимга вақтинчалик меҳнатга лаёқатсизлик белгиланганда ёки у касал бўлганда, ишга келиши шарт эмас, бу ҳақда иш берувчини хабардор қилса, кифоя. Бундай ҳолатда касаллик варақаси очилади, шунга асосан ходим ишга келмайди. Бошқа ҳолатларда ходимлар маъмурият буйруғи қабул қилинмагунича ишга келиши керак», — деди Акбар Тошқулов.
Мавзуга доир: Шерзод Шерматов мактабларда қайси ходимлар фаолиятини иш жойида амалга ошириши ҳақида маълумот берди
«Махсус комиссия барча ўқитувчиларга ҳам карантинни жорий қилиш бўйича қарор қабул қиладиган бўлса, улар ҳам карантин муносабати билан ишдан озод қилинади ва уларга қонунчиликда белгиланган миқдорда нафақа тўланади. Агар карантин жорий қилиниши ходимларга нисбатан ҳам бўлса, бундай ҳолатда ҳам иш берувчилар иш ҳақини маълум қисмини сақлаган ҳолда вақтинчалик меҳнатга лаёқатсизлик жорий қилинади», — деди.
Вазир ўринбосарининг таъкидлашича, вақтинчалик меҳнатга лаёқатсизлик жорий этилганида, ходим 8 йилдан ортиқ ишлаётган бўлса, унга иш ҳақининг 80 фоизи миқдорида, ундан кам ишлаётган бўлса, 60 фоизи миқдорида иш ҳақини тўлаб бериш мажбурий бўлади.
Изоҳ (0)