Ўзбекистоннинг Сеулдаги элчихонаси Тегу шаҳридаги компаниялардан бирининг икки ходимида 28 февраль куни коронавирус аниқлангани, тиббий кўрикдан сўнг компания ходимларининг бир қисми, жумладан, Ўзбекистон фуқароси ҳам эҳтиёт чораси сифатида карантинга жойлаштирилгани ҳақида хабар берди.
Маълум қилинишича, карантинга жойлаштирилган ўзбекистонлик ўзини яхши ҳис қилмоқда ҳамда яқинларини хавотирга қўймаслик учун исмини эълон қилмасликни сўраган.
Ўзбекистонлик фуқаро жойлаштирилган тиббий муассаса берган маълумотга кўра, ҳафта охиригача у яна бир қанча назорат тиббий кўригидан ўтади ва шундан сўнг унга касалхонадан жавоб берилиш мумкин.
Аввалроқ Жанубий Кореядаги коронавирусга чалинган хорижликлар орасида бир нафар Ўзбекистон фуқароси борлиги ҳақида хабар берилган эди.
Маълумот учун, Ўзбекистонда коронавирус юқтириб олганлар сони ўн бир кишига етди. 15 март куни бир муддат аввал Францияда бўлиб қайтган ўзбекистонлик аёлда коронавирус аниқлангани ҳақида хабар берилган эди. Кейинчалик унинг ўғли, қизи, турмуш ўртоғи ва неварасида ҳам вирус аниқлангани маълум қилинган эди. Олиб борилган таҳлил натижаларига кўра, Соғлиқни сақлаш вазирлигидан маълум қилишларича, ушбу бемор билан мулоқотда бўлган қариндошида ҳам коронавирус қайд этилган.
Бундан ташқари, 14 март куни Uzbekistan Airways’нинг Лондон—Тошкент рейсида келган Ўзбекистон фуқаросида ҳам коронавирус аниқланган. 15 март куни соат 05:15 да Uzbekistan Airways’нинг Истанбул—Тошкент рейсида келган Ўзбекистон фуқаросида ҳам коронавирус қайд этилган. Коронавирусга чалинган олти беморнинг аҳволи ҳозирча қониқарли экани маълум қилинди.
Изоҳ (0)