O‘zbekistonda koronavirus bilan kasallanish holatlari aniqlangani sababli barcha ta’lim muassasalari karantin uchun yopildi hamda boshqa tashkilotlarda sanitar-gigiyenik choralar kuchaytirildi. Adliya vazirligi karantin sharoitida ish beruvchi qanday ishlarni bajarishi kerakligini eslatib o‘tdi.

Unga ko‘ra, ish beruvchilar quyidagilarni amalga oshirishi zarur:

• ishlab chiqarish va sanitariya-maishiy binolarga, xodimlarning mehnat qilish, dam olish tartibiga doir sanitariya va gigiyena normativlariga rioya etishi;
• yuqumli va parazitar kasalliklar manbai bo‘lgan, shaxslarni vaqtincha ishdan chetlashtirishi;
• xodimlarning ishlab chiqarish sanitariyasi talablariga rioya etishlarini doimiy ravishda tekshirib borishi;
• xodimga karantin e’lon qilinganda vaqtincha mehnatga qobiliyatsizlik nafaqasini to‘lashi;
• mehnatni muhofaza qilishga oid talablarni buzganlikda aybdor xodimlarni intizomiy javobgarlikka tortishi;
• xodimlarning shaxsiy himoya vositalarini olish, saqlash, dezinfeksiya qilish va zararsizlantirishni o‘z mablag‘lari hisobidan amalga oshirishi.

So‘nggi ma’lumotlarga ko‘ra, O‘zbekistonda koronavirusga chalingan sakkiz kishining orasida og‘ir ahvoldagilar yo‘q, ularning ahvoli yomonlashmayapti. Bundan tashqari, 641 kishi kasalxonalarda, 5661 kishi esa uy sharoitida karantinga olingan.