Тошкентдаги барча талабалар турар жойлари 19 мартдан тўлиқ ёпилиб, дезинфекция қилинади. Бу ҳақда Олий ва ўрта масхус таълим вазирлиги матбуот хизмати хабар берди.
Қайд этилишича, Тошкент шаҳри ва Тошкент вилоятидан ташқари бошқа вилоятлардан келиб, пойтахтда таҳсил олаётган талабалар сони 81 минг нафарни ташкил қилади. Айни пайтда уларни ўз ота-оналари бағрига қайтариш ишлари давом этмоқда. Талабалар автобус, поезд ва самолётлар, йўналишсиз таксиларда жўнаб кетмоқда.
Автобусларда жўнаб кетиш истагини билдирган талабаларни доимий яшаш ҳудудларига кузатиш ишлари «Ёшлик» талабалар шаҳарчаси, Тошкент давлат педагогика университети, Тошкент ирригация ва қишлоқ хўжалигини механизациялаш муҳандислари институти, Тошкент темир йўл транспорти муҳандислари институти ҳудудларида амалга оширилди.
15 март, якшанба куни, 25 минг нафардан ортиқ, 16 март, душанба куни, яна 37 минг нафардан ортиқ, жами 72 минг нафардан ортиқ талаба Тошкент шаҳридан ўз уйларига жўнаб кетди.
Мавзуга доир: Тошкентдаги ОТМларда 30 минг нафар талаба ўзлари яшайдиган вилоятларга жўнаб кетди (фото)
Тошкент шаҳри ва ҳудудлардаги ОТМларда таҳсил олаётган ва ўз юртларига қайтишга улгурмаган хориждан келиб ўқиётган талабалар учун эса тегишли шароит яратиб берилади.
Эслатиб ўтамиз, коронавирус сабаб Ўзбекистондаги барча мактаблар, боғчалар ва ОТМлар 2020 йил 16 мартдан карантинга ёпилди. Йўловчиларни манзилга етказиш учун автовокзалдан қўшимча рейслар йўлга қўйила бошланди.
Изоҳ (0)