14 март, шанба куни соат 11:40 ларда Учтепа тумани «Чўпон ота» маҳалла фуқаролар йиғини ҳудудида жойлашган «Аксава» компаниясига қарашли икки қаватли автомобилларга хизмат кўрсатиш шохобчаси 2 та боксининг деразаси ва деворлари қисман қулаш содир бўлган.
Бирламчи маълумотларга кўра, ҳолатнинг келиб чиқишига кислород ёки газ баллонининг ёрилиши сабаб бўлганлиги тахмин қилинмоқда, дея хабар бермоқда Фавқулодда вазиятлар вазирлиги.
Бунинг оқибатида 1 нафар фуқаро воқеа жойида ва 1 нафари касалхонада вафот этган. Шунингдек, 4 нафар фуқаро турли даражадаги тан жароҳатлари билан шифохонага ётқизилган.
«Айни вақтда ҳодиса содир бўлган жойда Фавқулодда вазиятлар вазирлиги қутқарувчилари томонидан қидирув-қутқарув ишлари амалга оширилмоқда», — дейилади ФВВ ахборотида.
Қўшимча қилишларича, мазкур ҳолатнинг келиб чиқиш сабаблари юзасидан дастлабки терговолди суриштирув ишлари олиб борилмоқда.