Фото: Наманганда «электр таъминотидаги узилишлардан норози аҳолининг оммавий норозилик намойиши» бартараф этилмоқда
11 март куни вилоят ИИБ томонидан Наманган шаҳар «Отчопар» ўйингоҳида «Оммавий тартибсизликларни олдини олиш, жамоат тартибини сақлаш, фавқулодда ҳолатлар содир бўлганда унинг оқибатларини бартараф этиш» мавзусида ҳамкорликдаги махсус тактик машқи ўтказилди. Бу ҳақда Наманган вилояти ИИБ ахборот хизмати хабар қилди.
Тадбир Наманган вилояти ички ишлар органлари шахсий таркибини оммавий тартибсизликларни бартараф этиш вазифаларини бажарилиши борасидаги ҳаракатларини ўрганиш, бошқарув органлари ва ҳамкорликда жалб этиладиган кучларни жанговар вазифаларни бажаришга тайёргарлиги ҳолатини текшириш, ҳокимият, вилоят ҳуқуқни муҳофаза қилиш ва алоқадор идоралари билан ҳамкорлик масалалари самарадорлигини таъминлаш мақсадида ўтказилган.
Машқда Наманган вилояти ва Наманган шаҳар ҳокимлиги, вилоят ИИБ, прокуратура, ДХХ, Миллий гвардия, ФВБ, божхона, Соғлиқни сақлаш бошқармаси ва ҳудудий бўлимлари ҳамда бошқа алоқадор идоралар вакиллари иштирок этди.
Машқнинг шартли воқеасига кўра, 11 март куни соат 09:30 да Наманган шаҳар «Дўстлик бозори» ҳудудида буюмларни харид қилиш учун келган фуқаролар ва чакана савдо билан шуғулланаётган тадбиркорлар бозор ҳудудида мунтазам равишда электр манбаи ўчирилаётганлиги натижасида пластик карталардан савдо қилиш имкони бўлмаётганлигидан норози бўлиб, 200 нафарга яқин сотувчи ва фуқаро иштирокидаги рухсат этилмаган намойиш махсус куч воситалари орқали бартараф этилган.
