Uzbekistan Airways коронавирус таъсири Ўзбекистон авиациясигача етиб келгани ҳақидаги хабарга изоҳ берди

Uzbekistan Airways ижтимоий тармоқларда коронавируснинг авиация иқтисодиётига таъсир қилиши, авиакомпания ўз ходимларини ҳақ тўланмайдиган меҳнат таътилига жўнатишни режалаштираётгани, мажбурий таътилга деярли барча хизмат вакиллари жўнатилиши, вазият қанча давом этиши номаълумлиги ҳақида тарқалган хабарларга изоҳ берди. Бу ҳақда «Kun.uz» хабар берди.

«Бу хабар техникларимизнинг ички гуруҳида тарқалган, аммо ҳақиқатга зид. Қизиғи, бошқа йўналишлардан фарқли равишда айнан шу бўлим катта иш ҳажмига эга. Сабаби техник хизматларимиз энг камида апрель ойига қадар буюртмаларга эга ва тинимсиз ишлаяпти.

Энди бевосита Uzbekistan Airways’нинг фаолиятига келсак, чиндан ҳам кўплаб рейслар бекор қилинаётганидан хабарингиз бор. Бу нафақат бизда, балки бутун дунёда кузатилаётган ҳолат. Лекин шунга қарамай раҳбарият ишдан бўшатиш, мажбурий таътилга чиқаришни режалаштирмаган, аксинча бундай қилмаслик учун барча чораларни кўрмоқда.

Наврўз байрами арафасида ички рейсларга 50 фоизгача чегирмалар эълон қилдик. Халқаро рейслар бўйича ҳам бундай режаларимиз бор эди, аммо коронавирус тарқалиши билан боғлиқ вазият туфайли кейинга сурилди.

Энг муҳими, бутун дунё авиакомпаниялари бугунги кунда мураккаб вазиятда. Uzbekistan Airways вазиятдан камроқ талафот билан чиқиш йўлларини изламоқда. Хусусан, харидлар қайта кўриб чиқиляпти, оптимизация усуллари қўлланяпти.

Албатта, вазият кун сайин ўзгариб бормоқда ва буни ҳисобга олмасликнинг иложи йўқ. Агар шароит тақозоси билан қўшимча чора-тадбирлар кўришга мажбур бўлсак, бу ҳақда расман хабар берамиз», — деди миллий авиакомпания матбуот котиби Ҳабибулло Набиев.

Аввал Uzbekistan Airways’нинг коронавирус сабаб хориж фуқароларига жарима тўловисиз чипталарни қайтариш имкониятини бериши, Ўзбекистоннинг 14 мартдан бошлаб Франция, Италия ва Британия билан авиақатновларни тўхтатиши хабар қилинган.