Италия бош вазири коронавирус сабабли мамлакатнинг 14 та провинциясини ёпди

Италия бош вазири Жузеппе Конте мамлакатда коронавирус инфекцияси тарқалишига қарши кураш доирасида янги фармонни имзолади, дея хабар бермоқда Corriere della Sera.

Ҳужжатга мувофиқ, Италияда 8 мартдан 3 апрелга қадар бутун Ломбардияга, шунингдек, яна 14 та провинцияга кириш ва чиқиш тўхтатилади; ёпилган провинциялар: Парма, Пьяченца, Римини, Режо-нель-Эмилия, Модена, Пезаро, Урбино, Падуя, Тревизо, Алессандрия, Вербано-Кузио-Оссола, Новара, Верчелли ва Асти. Зарурат туғилса, бу ҳудудлар беморларни ўзаро қайта тақсимлаши мумкин.

Шундай қилиб, Италияда коронавирус эпидемияси энди бошланган вақтда жорий этилган ёпиқ «қизил ҳудудлар» энди бўлмайди. Номлари зикр этиб ўтилган провинцияларга кириш ва улардан чиқишга фақат фавқулодда ҳолатлардагина рухсат берилиши мумкин.

Бундан ташқари, ушбу ҳудудларда мактаблар, универсистетлар, спорт заллари ва музейлар фаолияти вақтинча ёпилади, диний маросимлар тўхтатилади. Ресторан ва барлар ўз ташрифчиларини бир-биридан хавфсиз масофа (камида бир метр)да жойлаштиришни таъминлай олсагина ишини давом эттириши мумкин.

Умумий эҳтиёт чоралари бутун Италия бўйлаб кўрилмоқда: музейлар ва букмекерлик идоралари ёпилмоқда, оммавий тадбирлар, хусусан, фильмлар, спектакллар намойишлари ва спорт мусобақалари бекор қилинмоқда.

Контенинг сўзларига кўра, кўрилаётган чоралар «ноқулайлик келтириб чиқарса-да», «жавобгарлик лаҳзаси»да зарурий ҳисобланади. «Биз ўзимизнинг ва яқинларимизнинг, ота-оналаримизнинг саломатлигини, аввало — бувиларимиз ва боболаримиз саломатлигини муҳофаза қилишимиз лозим. Чунки айнан кекса одамларнинг бу вирусга чалиниши эҳтимоли юқори эканлигини аниқладик», — деди бош вазир.

Аввалроқ Италияда Ломбардия ва 11 провинция ёпилиши мумкинлиги ҳақида La Repubblica ёзган эди. Bloomberg’нинг ҳисоб-китобларига кўра, мазкур чеклов чоралари 16 миллионга яқин аҳоли (Италия аҳолисининг учдан бири)нинг турмушига дахл қилиши мумкин.

Италия Соғлиқни сақлаш вазирлигининг 7 мартдаги маълумотларига кўра, мамлакатда 5061 кишида COVID-19 коронавируси аниқланган, уларнинг аксарияти — 3420 нафари — Ломбардияда. Вирус оқибатида мамлакатда 233 киши вафот этган.