Хитойнинг PetroChina нефть-газ компанияси табиий газ импортини қисман тўхтатиши ҳақида яқин ҳамкорларини огоҳлантиргани ҳақида хабарлар тарқалган эди. Ўзбекистон томони ушбу мазмундаги мактубни қабул қилгани, аммо айни пайтда газ етказиб бериш тўхтатилмаганини маълум қилди. Бу ҳақда Энергетика вазирлиги «Gazeta.uz»га муносабат билдирди.
«Ўзбекистон томони Хитой компаниясидан табиий газ импорти ҳажмининг қисқариши ҳақида огоҳлантириш олган. Аммо табиий газ етказиб беришда тўхталиш бўлмади ва ишлар одатий нормада давом этмоқда», — деди вазирлик матбуот котиби Элмира Бекмуродова.
Аввалроқ PetroChina айрим турдаги табиий газ, хусусан, сиқилган ва қувурлар орқали импорт қилинаётган газ сотиб олиш шартномаларини тўхтатгани хабар берилганди. Бу ҳақда хабар тарқатган Reuters агентлигига кўра, коронавирус инфекциясининг кенг тарқалиши мавсумий газ истеъмоли суръатига салбий таъсир кўрсатмоқда.
Давлат статистика қўмитаси маълумотларига кўра, Хитой Ўзбекистоннинг асосий савдо шерикларидан бири ҳисобланади. 2019 йилнинг 11 ой якунларига кўра, Ўзбекистон Хитойга 2,1 миллиард доллар қийматидаги товар ва хизматларни экспорт қилган. Ўзбекистоннинг ташқи иқтисодий фаолиятида газ экспорти қарийб 20 фоизлик улушга эга.
Расмий Тошкент ҳолатга изоҳ бериб, Ўзбекистоннинг Хитойга газ экспорти кейинроқ камайишини истисно этмади. Шунингдек, экспорт ҳажмидаги тушиш рақамларда ошкор этилмаган.
Мавзуга доир:
- Коронавирус сабаб Ўзбекистоннинг асосий экспорт маҳсулоти — олтиннинг нархи рекорд даражада кўтарилди
- Ўзбекистон иқтисодиёти Хитойдаги коронавирус туфайли қийин шароитларга дуч келиши мумкин
- Ўзбекистон дунёда коронавирус тарқалгани туфайли тахминан бир миллиард доллар йўқотиши мумкин
- Коронавирус эпидемиясига қарамай Ўзбекистонга келаётган хитойлик сайёҳлар сони ошди
Изоҳ (0)