Ўзбекистон Энергетика вазирлиги Саудия Арабистонининг ACWA Power компанияси билан умумий қиймати 2 миллиард долларга тенг учта келишув имзолади. Бу ҳақда вазирлик томонидан маълум қилинди.
Хабар берилишича, ушбу келишувлар Ўзбекистон энергетика соҳасининг тараққиёти ҳамда барқарорлигини янада такомиллаштиришга хизмат қилади.
Имзоланган биринчи ҳужжат 25 йилга мўлжалланган 1,2 миллиард долларлик инвестиция шартномаси бўлиб, у Сирдарё вилоятида 1500 мегаватт қувватли буғ-газ турбинали электр станциясини қуриш ҳамда эксплуатация қилишни кўзда тутади. Шунингдек, ҳужжат мазкур станцияда ишлаб чиқариладиган электр энергиясини сотиб олиш масаласини назарда тутади.
Ушбу электр энергияси ишлаб чиқаришга йўналтирилган инвестицион лойиҳада келишувга мувофиқ «Ўзбекистон миллий электр тармоқлари» акциядорлик жамияти ягона харидор сифатида иштирок этади.
Лойиҳага кўра, қуриладиган янги буғ-газ қурилмасининг самарадорлиги 60% дан зиёд бўлиб, одатда у электр энергия ишлаб чиқаришга сарфланадиган табиий газ миқдорини қарийб икки марта кўп тежаш имконини беради.
Қиймати 0,55-1,1 миллиард доллар бўлган иккинчи ҳужжатга асосан, ACWA Power Ўзбекистонда қуввати 500-1000 мегаваттга тенг шамол электр станциясини қуради.
Энергетика вазирлиги билан қайта тикланадиган энергиядан фойдаланиш бўйича имзоланган шартномага биноан, ACWA Power компанияси Ўзбекистонда 500-1000 МВт қувватга эга шамол электр станциясини қуради ва фойдаланишга топширади.
Бундан ташқари, Ўзбекистон Энергетика вазирлиги билан имзоланган учинчи келишувга мувофиқ, ACWA Power компанияси АҚШнинг Air Products & Chemicals компанияси билан ҳамкорликда Ўзбекистонда энергетика ва кимё технологияси соҳаларида мутахассислар тайёрлаш юзасидан Ширин шаҳридаги коллежда техник кўникмаларни ошириш бўйича ўқув дастурларини тақдим этади.
Тошкентда 2019 йилда бўлиб ўтган Марказий Осиё энергетика инвестицион форуми доирасида ACWA Power билан иссиқлик электр станцияси ва шамол электр станцияси қуриш бўйича асосий шартлар тўғрисидаги битимлар имзоланган эди. Ўшандан буён давом этган музокаралардан кейин иссиқлик электр станциясини қуриш бўйича тайёргарлик ишлари бошлангани ҳақида аввалроқ хабар берилган эди.
Изоҳ (0)