Ўзбекистон транспорт вазири Элёр Ғаниев Boeing компанияси вице-президенти Грегори Лекстон билан учрашди. Бу ҳақда Транспорт вазирлиги хабар берди.
Маълум қилинишича, учрашувда икки томонлама ҳамкорлик алоқаларини кенгайтириш масалалари муҳокама этилди. Грегори Лекстон Ўзбекистон минтақадаги мамлакатлар орасида авиапаркида Boeing 787 Dreamliner самолётлари энг кўп давлат эканлигини алоҳида қайд этди.
Транспорт вазири Элёр Ғаниев Boeing компанияси билан ўзаро ишончли ва самарали ҳамкорлик алоқаларини янада кенгайтириш, бу йўналишда биргаликда ишлаш ҳар икки томон учун ҳам манфаатли бўлишини таъкидлади.
Аввалроқ Uzbekistan Airways тўртта Boeing самолётини сотувга қўйгани ҳақида хабар берилган эди. Шунингдек, интернетда Ўзбекистон Президенти учун махсус тайёрланган Boeing 787-800 Dreamliner самолётининг илк суратлари пайдо бўлган эди. Шу вақтга қадар Ўзбекистон бешта Boeing 787-8 Dreamliner самолётини сотиб олган.
Изоҳ (0)