Ўзбекистон Президенти Шавкат Мирзиёев Халқаро хотин-қизлар куни муносабати билан жазони ўташ муассасаларида жазо ўтаётган 83 нафар аёлни афв этди. Бу ҳақда Президент матбуот хизмати хабар берди.
Маълум қилинишича, Президент Шавкат Мирзиёев «Халқаро хотин-қизлар байрами муносабати билан озодликдан маҳрум этиш жазосини ўтаётган бир гуруҳ маҳкум аёлларни афв этиш тўғрисида»ги фармонни имзолади.
Президент матбуот хизмати томонидан мазкур фармонга берилган шарҳга кўра, Халқаро хотин-қизлар байрами муносабати билан Ўзбекистон Президенти томонидан жазони ижро этиш муассасаларида жазо муддатини ўтаётган айрим маҳкум аёлларни афв этиш юзасидан билдирилган ташаббуси доирасида Президент ҳузуридаги Афв этиш масалалари бўйича комиссия, бошқа мутасадди идоралар вакилларидан иборат ишчи гуруҳ ташкил этилиб, бевосита жойларга чиққан ҳолда маҳкум аёлларнинг шахсини ўрганиш ва улар билан якка тартибда суҳбатлар ўтказилиши таъминланди.
Ўтказилган тадбир якуни бўйича комиссиянинг адашиб, билиб-билмай жиноят содир этган, ҳозирги вақтда қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ маҳкум аёлларни афв этиш ҳақидаги таклифи давлат раҳбари томонидан маъқулланган. «Халқаро хотин-қизлар байрами муносабати билан озодликдан маҳрум этиш жазосини ўтаётган бир гуруҳ маҳкум аёлларни афв этиш тўғрисида»ги фармон имзоланди.
Фармонга мувофиқ, жазо муддатини ўтаётган 83 нафар аёл афв этилди. Афв этилган аёлларнинг 12 нафари жазодан тўлиқ озод қилинади, 29 нафари жазони ўташдан муддатидан илгари шартли озод қилинади, 17 нафарига тайинланган жазо енгилроқ жазо билан алмаштирилади.
Жами 58 нафар аёл жазони ижро этиш муассасаларидан озод қилинмоқда. Шунингдек, 25 нафар маҳкума аёлга тайинланган озодликдан маҳрум этиш жазосининг муддатлари қисқартирилади. Афв этилганларнинг 7 нафарини чет эл фуқаролари ташкил этади.
Фармон ижроси юзасидан афв этилган аёлларни оиласи ва яқинлари бағрига қайтариш, ижтимоий ҳаётга мослашиб, фойдали меҳнат билан шуғулланиши, соғлом турмуш тарзини йўлга қўйиб, жамиятда муносиб ўрин топиши учун уларга кўмак бериш юзасидан масъул вазирлик ва идораларга тегишли топшириқлар берилган.
Аввалроқ Ўзбекистон Президенти жазо муддатини ўтаётган 58 кишини афв этган эди.
Изоҳ (0)