Яккабоғ тумани Бешқўтон қишлоғидаги 72-мактабда ўқийдиган 10-синф ўқувчиси 2019 йил мартида она бўлган. Бу ахборотни Қашқадарё вилояти Халқ таълими бошқармаси тасдиқлаган, дея хабар бермоқда «Дарё» мухбири.
«Дарё»га мурожаат қилган фуқаро Олим Муҳаммадиевнинг таъкидлашича, мактаб директори Дилором Умарованинг «ўқувчилар тақдирига бефарқлиги боис 10-синф ўқувчиси фарзандли бўлган».
Вилоят халқ таълими бошқармасидан маълум қилишларича, воқеадан сўнг мактаб директорига ҳайфсан берилган, директорнинг маънавий-маърифий ишлар бўйича ўринбосари Жўра Абдуллаевга ҳайфсан ва ойлик маошининг 30 фоизини ушлаб қолиш чораси қўлланилган. Бундан ташқари, мактаб психологи Илҳом Исмоилов ва ўқувчининг синф раҳбари Эргаш Зокиров ҳам ҳайфсан олган.
Мавзуга доир:
Пул ўзлаштириш ҳолатлари?
Фуқаро Олим Муҳаммадиевнинг маълум қилишича, 2017 йил март ойида 72-мактабда ўқитувчи бўлиб ишлайдиган рафиқаси Жамила Йўлдошевага 800 минг сўм мукофот пули ёзилган, бироқ бу пулни мактаб директори Дилором Умарова ва ҳисобчиси Ўткир Бердиев ўзлаштирган.
Бундан ташқари, Олим Муҳаммадиевнинг айтишича, директор мактабда ишламайдиган ўғлига 3,3 миллион сўм пулни ноқонуний тўлаб бергани учун туман прокуратураси томонидан жиноят иши очилган. Туман Молия бўлими ахборотига кўра, 1,71 миллион сўм пул мактаб ўқитувчиларининг аризасига кўра, қолган 1,6 миллион сўм эса директорнинг маоши ҳисобидан ўтказилган.
72-мактаб директори Дилором Умарова «Дарё» мухбири билан суҳбатда она сифатида ўғлига пул ўтказиб беришга ҳақли эканини айтди, бироқ мактаб ўқитувчилари нима сабабдан ўз ҳисобидан пул берганини изоҳламади.
Ўз навбатида, у фуқаро Олим Муҳаммадиевни туҳматчиликда айблади. «Олим Муҳаммадиев бир неча йилдан бери менга туҳмат қилиб келади. Кўп жойларга ёзди, тинчимни бузяпти. Аммо ёзаётган гаплари асосини топмаяпти. Ишлашимга халал беряпти», — деди директор.
Таниш-билишчилик?
Олим Муҳаммадиевнинг рафиқаси Жамила Йўлдошеванинг сўзларига кўра, 2019 йил август ойидаги дарс тақсимотида директорнинг ўқув ишлари бўйича ўринбосари унга 20 соат дарс берган, аммо директор «дарсга мен хўжайинман», деб унинг уч соат дарсини тортиб олган.
«Аслида дарс тақсимоти директорнинг ўқув ишлари бўйича ўринбосари томонидан амалга оширилади. Директор дарс тақсимотига аралашмаслиги керак», — дейди Жамила Йўлдошева. Унинг эри Олим Муҳаммадиев эса мактабда таниш-билишчилик авжига чиққанини таъкидлади.
«Директорнинг куёви физика ўқитувчиси бўлса-да, директор унга 10 соат математикани ҳам берган. Физика фани ўқитувчиси қандай қилиб математикадан дарс беради?», — дейди Олим Муҳаммадиев. У биология фани ўқитувчиси бўлган рафиқасига 16 соат дарс берилмаётганидан норози бўлган.
Дилором Умарова математика мутахассиси йўқлиги учун дарсни физик куёвига берганини тасдиқлаган. Жамила Йўлдошевага 16 соат биология дарсини бермаётганини эса унинг ташкилотларга мурожаат қилиб юргани билан боғлади ва атайлаб дарс бермаётганини тан олди.
Изоҳ (0)