Ўзбекистон Президентининг 2019 йил 13 декабрдаги қарори асосида Ахборот ва оммавий коммуникациялар агентлиги туҳмат ва ҳақорат учун озодликдан маҳрум қилиш билан боғлиқ бўлган жиноий жазо турини тайинлашни бекор қилиш юзасидан таклифлар ишлаб чиқиб, жамоатчилик муҳокамаси учун эълон қилган. Миллий масс-медиани қўллаб-қувватлаш ва ривожлантириш жамоат фонди мазкур қилмишлар учун жавобгарликни енгиллаштириш бўйича ўз таклифларини берди.
Мавзуга доир: Ўзбекистонда Жиноят кодексидан туҳмат ва ҳақорат учун озодликдан маҳрум этиш чиқариб ташланиши мумкин
Қайд этилишича, фуқаролик жамиятининг вакили сифатида Миллий масс-медиани қўллаб-қувватлаш ва ривожлантириш жамоат фонди туҳмат ёки ҳақоратнинг ҳар қандай шакли учун озодликдан маҳрум қилиш тарзидаги жазонинг бекор қилинаётганини тўлиқ қўллаб-қувватлайди.
Фонд томонидан ташкил этилган ишчи гуруҳдаги журналист ва блогерларнинг фикрларини инобатга олиб, туҳмат ёки ҳақоратга оид жиноий жавобгарликни белгилаш масаласи юзасидан бир қатор таклифлари ишлаб чиқилган.Биринчи таклифга кўра, энг аввало, оммавий ахборот воситалари орқали туҳмат ёки ҳақорат қилганлик учун Жиноят кодексида белгиланган алоҳида оғирлаштирувчи қисмни чиқариб ташлаш лозим. Ҳозирги ҳолатда ОАВ орқали қилинган туҳмат ёки ҳақорат тўғридан-тўғри жиноий жавобгарликка тортиш учун асос бўлади. Мазкур оғирлаштирувчи қисмни чиқариб ташлаб, журналистлар учун дастлаб жиноий эмас, балки маъмурий жавобгарликни белгилаш мақсадга мувофиқ бўлади.
Шунингдек, амалдаги Жиноят кодексида туҳмат ёки ҳақорат учун белгиланган жарима жазоси миқдорлари жуда катта. Жумладан, умумий ҳолатда 44 миллион сўмгача, оғирлаштирувчи ҳолатда эса 133 миллион сўмгача жарима белгиланган. Шу сабабли мазкур жарима миқдорларини кескин камайтириш мақсадга мувофиқ.
Учинчи таклифга кўра, амалдаги қонунчиликда ҳақорат қилиш жабрланувчини ўз хизмат ёки фуқаролик бурчини бажариши муносабати билан боғлиқ ҳолда содир этилган бўлса, бу оғирлаштирувчи банд сифатида тўғридан-тўғри жиноий жавобгарликка тортиш учун асос бўлади. Лекин аксинча ўз хизмат бурчини бажараётган шахслар бошқа фуқароларни ҳақорат қилса, бу дастлаб маъмурий жавобгарликни келтириб чиқаради. Ушбу ҳолат ижтимоий адолат нуқтаи назаридан қайта кўриб чиқилиши ва мазкур кичик бандни чиқариб ташлаш таклиф этилади.
Эслатиб ўтамиз, Миллий масс-медиани қўллаб-қувватлаш ва ривожлантириш жамоат фонди 2020 йилннг январь ойида ОАВ ва блогерларни қўллаб-қувватловчи янги жамоат фонди сифатида иш бошлади. Комил Алламжонов ва Саида Мирзиёева жамоат фонди васийлик кенгашига раҳбарлик қилмоқда.
Изоҳ (0)