«Бухоро адолати плюс» адвокатлик фирмаси адвокати Мақсуд Камолов 2018 йил 25 декабрь куни Ғиждувон туман Ички ишлар органлари (ИИО) фаолиятини мувофиқлаштириш бошқармаси (ФМБ) ходимлари томонидан калтакланиб, ўрта оғир даражада тан жароҳати олган. Суд 2019 йил ноябрида бу ишни кўриб чиқиб, ИИБ ходими Турсунпўлат Саидовни айбдор деб топган, бироқ «Дарё» мухбирининг маълум қилишича, адвокат бундан қониқиш ҳосил қилмаган.
Воқеа қандай содир бўлган эди?
«Бухоро адолати плюс» адвокатлик фирмаси адвокати Мақсуд Камолов 2018 йил 25 декабрь куни Ғиждувон тумани ИИО ФМБ терговчиси Б.Файзуллаевнинг чақирувига асосан ҳимояси остида бўлган фуқароларга оид жиноят иши бўйича тергов ҳаракатларида иштирок этиш учун жамоатчи ёрдамчиси билан Ғиждувон тумани ИИБга борган. Шу куни катта инспектор Турсунпўлат Саидов ва жамоат тартибини сақлаш гуруҳи инспектор-кинологи, сафдор Аббос Зайниев ИИБ биноси назорат-ўтказиш пунктида навбатчиликда бўлган.
Мақсуд Камолов Турсунпўлат Саидовга маъмурий бинога уяли телефонини олиб кириши лозимлигини, тергов ҳаракатларида фойдаланмоқчи эканини билдирган. Бироқ инспектор бу мумкин эмаслигини айтган. Ўртада келишмовчилик келиб чиқиб, инспектор адвокатни назорат-ўтказиш пункти хонасига тортиб киритиб, калтаклаган — ўнг қўли билан адвокатнинг чап қовурғасига уч маротаба ва ўнг оёғининг тиззаси билан кўкрак қафасига бир марта тепиб, қўлини орқага қайирган ҳолда жисмоний қийнаган.
Шундан сўнг у адвокатни энгаштирган ҳолда туман ИИБнинг навбатчилик қисмига олиб борган ва адвокатни етти-саккиз нафар бошқа ҳамкасбига топшириб, хизмат жойига қайтган. Мақсуд Камолов орган ходимларига Турсунпўлат Саидов унга куч ишлатганини айтган. Воқеадан хабар топган Ғиждувон тумани ИИБ бошлиғи биринчи ўринбосари А.Носиров ва тергов бўлими бошлиғи Ғ.Адилов улардан ярашишини сўраб, адвокатни тинчлантиришга уринган.
Адвокатнинг сўзларига кўра, у ўрта оғир даражада жароҳат олганига қарамай, тез ёрдам чақирилмаган, айни вақтда унинг хонадан чиқиб кетишига ҳам йўл қўйилмаган. Адвокат Камолов ИИБ ходимлари кузатувида туман прокуратураси терговчисининг хизмат хонасига олиб борилган. Туман прокурори: «Бу ичган, тезда суд тиббий кўригидан ўтказиш тўғрисида қарор чиқариб, туман тез ёрдам бўлимидан нарколог чақириб, текширтиринг», дея буйруқ берган.
Орадан анча вақт ўтгач, тез тиббий ёрдам хизмати шифокори ва ҳамшираси кириб келиб, адвокатнинг қон босимини ўлчаб, дори берган. Қон босими кўтарилавергач, адвокат 6-7 нафар ИИБ ходими ҳамроҳлигида Ғиждувон туман тез тиббий ёрдам бўлимига олиб борилган. Бироқ шифокорлар унга оғриқ қолдириш учун ҳеч қандай муолажа қилмаган. ИИБ ходимлари эса адвокатни нарколог кўригидан ўтказишга уринган.
Соғлиғи ёмонлашган адвокатни яқинлари Республика шошилинч тиббий ёрдам илмий маркази Бухоро филиалига олиб борган. Навбатчи жарроҳ ва травматолог томонидан рентген кўригидан ўтказилгач, чап томон 7, 8, 9-қовурғалари ёпиқ синганлиги аниқланган ва аҳволи оғирлашаётганлиги сабабли филиалнинг 2-шошилинч жарроҳлик бўлимига стационар даволаниш учун ётқизилган.
Туман прокуратурасининг ҳаракатлари қанчалик асосли?
Суд тиббий экспертизаси томонидан ИИБ ходими Турсунпўлат Саидов ваколатидан четга чиқиб, жисмоний куч ишлатишда ифодаланган ҳаракатлари боис, Мақсуд Камоловнинг чап томон 7, 8, 9-қовурғалари ёпиқ синишига олиб келган ва баданга қасддан ўрта оғир шикаст етказилган, деган ташхис қўйилган.Орадан 23 кун ўтгач, Ғиждувон тумани прокуратураси терговчиси С.Одилов адвокатни хизмат хонасига чақиртирган ва етти нафар ИИБ масъул ходими томонидан тузилган далолатномага кўра, унга тан жароҳати етказилмаганини айтган.
Шунингдек, туман прокуратураси терговчиси адвокатнинг ўзи маст ҳолатда инспектор Турсунпўлат Саидовни ҳақорат қилгани ва унга ҳеч қандай тан жароҳати етказмагани, бундан ташқари, Ғиждувон туман суди тиббий экспертизаси эксперти Фахриддин Аҳмедов томонидан Турсунпўлат Саидовга нисбатан берилган 263-сонли хулоса атайин бўрттирилганини айтган.
ИИБ ходимига тайинланган жазо
Судланувчи Турсунпўлат Саидов судда ўз айбига иқрор бўлмаса-да, унинг айби жиноят иши бўйича суд мажлисида сўроқ қилинган жабрланувчи ва гувоҳларнинг кўрсатмалари ҳамда суд мажлисида ўрганилган объектив далиллар мажмуи билан тасдиқланган.Суд инспектор Турсунпўлот Саидовни Жиноят кодексининг 206-моддаси (ҳокимият ёки мансаб ваколати доирасидан четга чиқиш) 1-қисми билан айбли деб топган ва унга нисбатан ойлик иш ҳақининг 20 фоизини давлат даромади ҳисобига ушлаб қолиш шарти билан 1 йил муддатга ахлоқ тузатиш ишлари жазоси тайинланган.
Шунингдек, Жиноят кодексининг 45-моддасига асосан, Турсунпўлат Саидов бир йил муддатга моддий жавобгарлик ва мансабдорлик лавозимларида, яъни ички ишлар идоралари тизимида ишлаш ҳуқуқидан маҳрум қилинган.
Адвокат нимадан норози?
«Менга тан жароҳати етказган инспекторга нисбатан жазо қўлланилди. Бироқ шу жиноят ишини тергов қилиш жараёнида Ғиждувон тумани прокурори ҳамда унинг ёрдамчилари, шунингдек, туман ИИБ бошлиғининг икки ўринбосари, тўрт масъул ходими, эксперт ва травмотологлар ҳам аслида жиноий жавобгарликка дахлдор, улар ҳам ўз хизмат мавқеини суиистеъмол қилди», — дейди адвокат Мақсуд Камолов.Адвокат бу борада Бухоро вилояти судига кассация шикояти билан мурожаат қилган.
Изоҳ (0)