“Buxoro adolati plyus” advokatlik firmasi advokati Maqsud Kamolov 2018-yil 25-dekabr kuni G‘ijduvon tuman Ichki ishlar organlari (IIO) faoliyatini muvofiqlashtirish boshqarmasi (FMB) xodimlari tomonidan kaltaklanib, o‘rta og‘ir darajada tan jarohati olgan. Sud 2019-yil noyabrida bu ishni ko‘rib chiqib, IIB xodimi Tursunpo‘lat Saidovni aybdor deb topgan, biroq “Daryo” muxbirining ma’lum qilishicha, advokat bundan qoniqish hosil qilmagan.
Voqea qanday sodir bo‘lgan edi?
“Buxoro adolati plyus” advokatlik firmasi advokati Maqsud Kamolov 2018-yil 25-dekabr kuni G‘ijduvon tumani IIO FMB tergovchisi B.Fayzullayevning chaqiruviga asosan himoyasi ostida bo‘lgan fuqarolarga oid jinoyat ishi bo‘yicha tergov harakatlarida ishtirok etish uchun jamoatchi yordamchisi bilan G‘ijduvon tumani IIBga borgan. Shu kuni katta inspektor Tursunpo‘lat Saidov va jamoat tartibini saqlash guruhi inspektor-kinologi, safdor Abbos Zayniyev IIB binosi nazorat-o‘tkazish punktida navbatchilikda bo‘lgan.
Maqsud Kamolov Tursunpo‘lat Saidovga ma’muriy binoga uyali telefonini olib kirishi lozimligini, tergov harakatlarida foydalanmoqchi ekanini bildirgan. Biroq inspektor bu mumkin emasligini aytgan. O‘rtada kelishmovchilik kelib chiqib, inspektor advokatni nazorat-o‘tkazish punkti xonasiga tortib kiritib, kaltaklagan — o‘ng qo‘li bilan advokatning chap qovurg‘asiga uch marotaba va o‘ng oyog‘ining tizzasi bilan ko‘krak qafasiga bir marta tepib, qo‘lini orqaga qayirgan holda jismoniy qiynagan.
Shundan so‘ng u advokatni engashtirgan holda tuman IIBning navbatchilik qismiga olib borgan va advokatni yetti-sakkiz nafar boshqa hamkasbiga topshirib, xizmat joyiga qaytgan. Maqsud Kamolov organ xodimlariga Tursunpo‘lat Saidov unga kuch ishlatganini aytgan. Voqeadan xabar topgan G‘ijduvon tumani IIB boshlig‘i birinchi o‘rinbosari A.Nosirov va tergov bo‘limi boshlig‘i G‘.Adilov ulardan yarashishini so‘rab, advokatni tinchlantirishga uringan.
Advokatning so‘zlariga ko‘ra, u o‘rta og‘ir darajada jarohat olganiga qaramay, tez yordam chaqirilmagan, ayni vaqtda uning xonadan chiqib ketishiga ham yo‘l qo‘yilmagan. Advokat Kamolov IIB xodimlari kuzatuvida tuman prokuraturasi tergovchisining xizmat xonasiga olib borilgan. Tuman prokurori: “Bu ichgan, tezda sud tibbiy ko‘rigidan o‘tkazish to‘g‘risida qaror chiqarib, tuman tez yordam bo‘limidan narkolog chaqirib, tekshirtiring”, deya buyruq bergan.
Oradan ancha vaqt o‘tgach, tez tibbiy yordam xizmati shifokori va hamshirasi kirib kelib, advokatning qon bosimini o‘lchab, dori bergan. Qon bosimi ko‘tarilavergach, advokat 6-7 nafar IIB xodimi hamrohligida G‘ijduvon tuman tez tibbiy yordam bo‘limiga olib borilgan. Biroq shifokorlar unga og‘riq qoldirish uchun hech qanday muolaja qilmagan. IIB xodimlari esa advokatni narkolog ko‘rigidan o‘tkazishga uringan.
Sog‘lig‘i yomonlashgan advokatni yaqinlari Respublika shoshilinch tibbiy yordam ilmiy markazi Buxoro filialiga olib borgan. Navbatchi jarroh va travmatolog tomonidan rentgen ko‘rigidan o‘tkazilgach, chap tomon 7, 8, 9-qovurg‘alari yopiq singanligi aniqlangan va ahvoli og‘irlashayotganligi sababli filialning 2-shoshilinch jarrohlik bo‘limiga statsionar davolanish uchun yotqizilgan.
Tuman prokuraturasining harakatlari qanchalik asosli?
Sud tibbiy ekspertizasi tomonidan IIB xodimi Tursunpo‘lat Saidov vakolatidan chetga chiqib, jismoniy kuch ishlatishda ifodalangan harakatlari bois, Maqsud Kamolovning chap tomon 7, 8, 9-qovurg‘alari yopiq sinishiga olib kelgan va badanga qasddan o‘rta og‘ir shikast yetkazilgan, degan tashxis qo‘yilgan.Oradan 23 kun o‘tgach, G‘ijduvon tumani prokuraturasi tergovchisi S.Odilov advokatni xizmat xonasiga chaqirtirgan va yetti nafar IIB mas’ul xodimi tomonidan tuzilgan dalolatnomaga ko‘ra, unga tan jarohati yetkazilmaganini aytgan.
Shuningdek, tuman prokuraturasi tergovchisi advokatning o‘zi mast holatda inspektor Tursunpo‘lat Saidovni haqorat qilgani va unga hech qanday tan jarohati yetkazmagani, bundan tashqari, G‘ijduvon tuman sudi tibbiy ekspertizasi eksperti Faxriddin Ahmedov tomonidan Tursunpo‘lat Saidovga nisbatan berilgan 263-sonli xulosa atayin bo‘rttirilganini aytgan.
IIB xodimiga tayinlangan jazo
Sudlanuvchi Tursunpo‘lat Saidov sudda o‘z aybiga iqror bo‘lmasa-da, uning aybi jinoyat ishi bo‘yicha sud majlisida so‘roq qilingan jabrlanuvchi va guvohlarning ko‘rsatmalari hamda sud majlisida o‘rganilgan obyektiv dalillar majmui bilan tasdiqlangan.Sud inspektor Tursunpo‘lot Saidovni Jinoyat kodeksining 206-moddasi (hokimiyat yoki mansab vakolati doirasidan chetga chiqish) 1-qismi bilan aybli deb topgan va unga nisbatan oylik ish haqining 20 foizini davlat daromadi hisobiga ushlab qolish sharti bilan 1 yil muddatga axloq tuzatish ishlari jazosi tayinlangan.
Shuningdek, Jinoyat kodeksining 45-moddasiga asosan, Tursunpo‘lat Saidov bir yil muddatga moddiy javobgarlik va mansabdorlik lavozimlarida, ya’ni ichki ishlar idoralari tizimida ishlash huquqidan mahrum qilingan.
Advokat nimadan norozi?
“Menga tan jarohati yetkazgan inspektorga nisbatan jazo qo‘llanildi. Biroq shu jinoyat ishini tergov qilish jarayonida G‘ijduvon tumani prokurori hamda uning yordamchilari, shuningdek, tuman IIB boshlig‘ining ikki o‘rinbosari, to‘rt mas’ul xodimi, ekspert va travmotologlar ham aslida jinoiy javobgarlikka daxldor, ular ham o‘z xizmat mavqeini suiiste’mol qildi”, — deydi advokat Maqsud Kamolov.Advokat bu borada Buxoro viloyati sudiga kassatsiya shikoyati bilan murojaat qilgan.
Izoh (0)