Коронавирус Европа бўйлаб тарқалишда давом этмоқда

Сўнгги кунларда коронавирус билан зарарланиш ва у билан боғлиқ ўлим ҳолатлари бир нечта Европа мамлакатида қайд этилди. «РБК Украина» мазкур мамлакатлардаги ҳолат ҳақида хабар берди.

Швейцария

Швейцария расмийлари 25 февраль куни коронавирус юқтириб олиш бўйича биринчи ҳолатни тасдиқлади. 70 ёшли эркак вирус билан зарарланган. Дастлабки маълумотларга кўра, зарарланиш эркак Милага ташриф буюрганида юз берган. Кейинчалик яна учта ҳолат қайд этилди.

Италия

Италия бугунги кунда Европада коронавирусдан энг кўп азият чекмоқда, бу мамлакатда вирус юқтирганлар сони 500 кишидан ошди. Шунингдек, мамлакатда 14 та ўлим ҳолати қайд этилган.

Греция

Жорий ҳафтада Грецияда касалланиш билан боғлиқ биринчи ҳолат қайд этилган. 38 ёшли аёл Италиянинг шимолига ташриф буюргандан кейин касалланган. Кейинроқ яна иккита ҳолат аниқланган.

Грузия

Грузия соғлиқни сақлаш вазири Екатерина Тикарадзенинг айтишича, бир кун олдин Эрондан Озарбайжон орқали келган ўрта ёшли киши вирус билан зарарланган. Коронавируснинг тарқалиш хавфи йўқ, касалланган киши билан алоқада бўлганларнинг ҳаммаси карантинга олинади

Эстония

27 февраль, чоршанба куни Ижтимоий ишлар вазири Танел Киик Эстонияда коронавирус билан боғлиқ биринчи ҳолат қайд этилганини маълум қилди. Касалланган киши мамлакат фуқароси эмас, аммо у ерда доимий яшайдиган одам бўлиб чиқди. Вирусга чалинган одам чоршанба куни кечқурун Эрондан Эстонияга қайтган.

Дания

Шунингдек, 27 февраль куни Данияда ҳам COVID-19 коронавирус билан боғлиқ биринчи ҳолати қайд этилди. Касалланган киши Италиядаги курортда бўлиб қайтган.

Норвегия

Норвегия Соғлиқни сақлаш вазирлиги 26 февраль куни мамлакатдаги коронавирус билан касалланиш бўйича биринчи ҳолатни тасдиқлади. Коронавирус ўтган ҳафтанинг охирида Хитойдан қайтиб келган одамда қайд этилган ва у ўша вақтдан бери карантинда бўлган. Маҳаллий расмийлар янги вирус тарқалишининг эҳтимоли паст деб ҳисобламоқда.

Шимолий Македония

Шимолий Македонияда 26 февраль куни коронавирус инфекциясининг биринчи ҳолати тасдиқланди. Тиббий ёрдамга мурожаат қилган аёл Италиядан келган.

Германия

Коронавирус билан касалланганлар сони бўйича иккинчи ўринда Германия жойлашган, бу давлатда 21 та ҳолат қайд этилган. Коронавирус инфекцияси мамлакатда январь ойининг охиридан бери қайд этилган, бугунги кунгача ўлим ҳолатлари юз бермаган.

Франция

Францияда коронавирус юқтириб олиш бўйича 19 та ҳолат қайд этилган, уларнинг иккитаси ўлим тугаган. Кекса эркак 26 февраль куни Париждаги Salpetriere касалхонасида вафот этди, ундан олдин 80 ёшли Хитой фуқароси вафот этган.

Буюк Британия

Буюк Британия оролларида коронавирус бўйича 15 та ҳолат қайд этилган. Аввалроқ у ерда иккита мактаб каратин учун ёпилган эди, уларнинг ўқувчилари Италияда бўлиб қайтган.

Испания

Сўнгги маълумотларга кўра, Испанияда 12 киши вирусни юқтирган. Мазкур ҳолатлар Мадрид, Каталония, Канар ороллари ва Майоркада қайд этилган.

Австрия

Коронавирус бўйича дастлабки ҳолатлар Австрияда ҳам қайд этилди. Маҳаллий расмийлар ма`лумотларига кўра, Инсбрукда яшайдиган икки нафар Италия фуқароси касалланган. Ломбардияга ташриф буюрганидан кейин уларда коронавирус аниқланган. Венада ҳам вирус билан боғлиқ ҳолат қайд этилган.

Хорватия

Хорватияда коронавирус билан боғлиқ учта ҳолати қайд этилди. Камида бир нафар эркак Италиянинг Милан шаҳрига сафари пайтида вирус юқтиргани маълум бўлган.

Исроил

Сўнгги кунларда Исроилда коронавируснинг иккинчи ҳолати тасдиқланди. Биринчи ҳолатда бўлгани каби, инфекция Diamond Princess круиз кемасининг йўловчисида аниқланди. 27 февраль куни учинчи ҳолат ҳақида маълум бўлди.

Россия

Россияда коронавирус январь ойи охирида бир аёл ва бир эркакда аниқланган. Иккаласи ҳам Хитой фуқаролари бўлган ва улар махсус изоляторларга ётқизилган. Улар билан алоқада бўлган одамлар ҳам касалхоналарга жойлаштирилган.

Руминия

Руминияда коронавируснинг бўйича биринчи ҳолат жорий ҳафта қайд этилди. Вирус юқтирган одам уч ҳафта олдин Италияга ташриф буюрган. У Бухарестдаги касалхонада карантинга жойлаштирилган.

Бельгия

Февраль ойи бошларида Хитойнинг Ухань шаҳридан эвакуация қилинганлардан бирида коронавирус аниқланган. Карантиндаги эвакуация қилинган гуруҳнинг бошқа аъзолари таҳлиллари салбий натижа берган.

Финляндия

Бугунги кунда маълум бўлган ягона ҳолат январь охирида қайд этилган. Аввалроқ Уханда бўлган 32 ёшли аёл касал бўлиб қолгани ҳақида хабар берилган.

Швеция

Коронавирус Уханга ташриф буюрган ҳамда Енчепинг шаҳрида яшовчи аёлда аниқланди.