Эрон вице-президенти коронавирус юқтириб олгани маълум қилинди

Эронда хотин-қизлар ва оила масалалари бўйича вице-президент Маъсума Эбтекар COVID-19 коронавирусини юқтириб олганини тан олди. Бу ҳақда «ТАСС» хабар қилган.

Агентлик хабарига кўра, сиёсатчи 26 февраль, чоршанба куни, текширувдан ўтган. Таҳлил натижалари 27 февраль, пайшанба куни, тонгда маълум бўлган. Инфекциянинг тарқалишидан хавотирланаётган Эбтекар ўз уйида карантинга олинган.

Эбтекар Эрон ислом республикасида янги турдаги вирус қайд этилган биринчи сиёсатчи эмас. Топширилган тест натижалари Эрон Мажлисининг миллий хавфсизлик масалалари қўмитаси раҳбари Мужоб Зоннур, депутат Маҳдум Содиқийда ҳам ижобий натижа кўрсатган. Шунингдек, Эронда соғлиқни сақлаш вазири ўринбосари Ирож Харирчи ҳам коронавирус билан касалланган.

Аввал Эроннинг Хитойдан кейин коронавируснинг энг катта ўчоқларидан бирига айлангани, у ерда COVID-19 касаллиги туфайли 20 нафардан ортиқ одам ҳалок бўлгани ва бу ХХРдан ташқарида кузатилган энг юқори кўрсаткич экани хабар қилинган.

Эрон ССВ 19 февралда мамлакатда янги турдаги коронавирус касаллигига чалиниш ҳолати кузатилганини маълум қилган. Коронавирус мамлакатнинг Қум вилоятида кузатилган. Расмий маълумотларга кўра, Эронда 245 нафар одам коронавирус юқтириб олган, уларнинг камида 26 нафарида касалликнинг энг юқори босқичи, яъни ўлим кузатилгани тахмин қилинмоқда.

27 февраль ҳолатига кўра, бутун дунёда тахминан 82,5 минг нафар одам коронавирус билан касалланган. Улардан 2,8 минг нафари вафот этган, 33,2 мингдан зиёд киши инфекциядан тузалган. COVID-19 вирусига чалиниш ҳолатлари Хитойдан ташқари яна 40 дан зиёд мамлакатларда ҳам кузатилган.