Хитойда коронавирусга чалинган ҳар бир киши ўзи ҳақида маълум қилгани учун 1430 доллар олиши ваъда қилинди

Хитойнинг Цяньцзян шаҳри расмийлари катта пул мукофотлари тўлашни ваъда қилиб, аҳолини тиббий кўрикдан ўтишга жалб қилмоқда. Шаҳар раҳбарияти шифокор қабулига келган ҳар бир кишига бир минг юань, организмида коронавирус аниқланган ҳар бири кишига эса 10 минг юань таклиф қилмоқда. Бу ҳақда «РБК» хабар берди.

Қайд этилишича, Хитойда COVID-19 коронавирусидан азият чекканлар, уни юқтирган одамларни аниқлаш усулларини такомиллаштириш орқали унинг тарқалишини тўхтатишга ҳаракат қилинмоқда. Февраль ойи бошида касаллик тарқалишининг марказига айланган Хубэй провинциясидаги Фансянь уезди маъмурлари ўз ихтиёри билан текширувга келган ҳар бир кишига бир минг юань (143 доллар) ва касалланганлар ҳақида ҳукуматни хабардор қилганларга 500 юань (71,5 доллар) тўлашни ваъда қилган.

Кейинчалик бошқа шаҳарлар ҳокимиятлари ҳам касаллик ҳақида хабар берганларга мукофот тўланиши ҳақида эълон қила бошлади. Масалан, Шицзячжуан шаҳри мерияси Ухандан яқинда қайтиб келган киши тўғрисида расмийларга хабар берадиган биринчиси кишига 2000 юань (285 доллар) тўлашини маълум қилди. Наньчан шаҳрида бундай маълумот учун 500 юань ваъда қилинган. Вирусга қарши кураш доирасида Дэян шаҳри расмийлари яқинда Сичуань провинциясидан ташқарига қилган саёҳатини яширган, ёввойи ҳайвонларни сотадиган, оммавий тадбирларни ўтказадиган киши ҳақида берилган маълумот учун бир минг юангача мукофот ваъда қилган.

Февраль ойи охирида Цяньцзян шаҳри расмийлари янада олдинга силжиб, ўз ихтиёри билан коронавирусга чалингани ҳақида хабар берган кишиларга кўпроқ пул тўлашини маълум қилган. Шаҳар ҳокимияти текширувга келган ҳар бир кишига бир минг юань ва коронавирус аниқланган кишига бирданига 10 минг юань (1430 доллар) тўлашни ваъда қилмоқда. Касаллик юққанлиги гумон қилинган кишига эса икки минг юань тўланади.

Тўловни олиш учун иккита шартни бажариш керак бўлади: ихтиёрий равишда текширув учун келиш; бу ишни 2 мартгача амалга ошириш.

Мукофот эълон қилинган вақтда Сянцзянда 200 га яқин киши коронавирус юқтирганлиги аниқланган. Улар мукофот олишга умид қила олмайди.

Сўнгги маълумотларга кўра, Хитойда коронавирус оқибатида вафот этганлар сони 2,8 мингга яқинлашди. Саудия Арабистони коронавирус сабабли Умра зиёратчиларининг мамлакатга киришини вақтинчалик тақиқлади. Ўзбекистон Дин ишлари бўйича қўмитаси Умра визаси берилиши вақтинча тўхтатилганини маълум қилди. Жанубий Кореядан Тошкентга учиб келган самолёт йўловчилари изоляция қилинди. Ўзбекистон Соғлиқни сақлаш вазирлиги Сеулдан келган йўловчиларнинг изоляцияси бўйича маълумот берди.