Ҳиндистон пойтахти Нью-Дели шаҳрида мусулмонлар ва ҳиндуийлик дини вакиллари ўртасида юз бераётган қонли тўқнашувлар сабабли мусулмонлар кўпчиликни ташкил қиладиган ҳудудда яшовчи ҳиндуийлик дини вакили бўлган оила ўз қизининг никоҳ тўйини бекор қилишга мажбур бўлди. Бу ҳақда Reuters хабар берди.
Турмушга чиқиши керак бўлган 23 ёшли қиз Савитри Прасаднинг айтишича, 25 февраль, сешанба куни, унинг никоҳ тўйи бўлиши керак эди. Бироқ шу куни унинг кўчасида юз берган тўқнашувлар сабабли қиз тўй кўйлагида безанган ҳолда уйида йиғлаб ўтирган.
Бироқ тўқнашувларнинг эртаси куни тўйни ўтказган Савитрининг отасига кўра, мусулмон қўшнилар унинг оиласидек бўлиб қолган ҳамда у мусулмонлар билан бирга эканлигидан хурсанд бўлган.
Савитри тўй маросими куни унинг уйига ташриф буюрган Reuters мухбирларига «Менинг мусулмон акаларим бугун мени ҳимоя қилмоқда», — деб айтган ҳамда унинг оиласи ва қўшнилари уни юпатгани учун яна йиғлаб юборган.
Урф-одатлар Чанд Ба туманидаги тор кўчада жойлашган Савитрининг уйида бўлиб ўтган. Бир неча қадам наридаги асосий кўча уруш майдонига ўхшайди, машиналар ёқилган ва дўконлар вайрон қилинган, мусулмонлар ибодатхонаси ёқиб юборилган, унинг олдидаги майдон тўқнашувчи икки томон бир-бирига улоқтирган тошлар билан тўлган.
Жорий ҳафтада Чанд Ба ва Деҳлининг бошқа ҳудудларида юз берган тўқнашувларда камида 32 киши ҳалок бўлган. Юзлаб ҳиндуийлар ва мусулмонлар сўнгги 10 кунликда мамлакат пойтахтида юз берган тартибсизликларда жароҳат олган.
«Айвонга чиқдик ҳамда тутунни, жуда кўп тутунни кўрдик. Бу даҳшатли эди, биз тинчликни хоҳлаймиз», — деб гапиради Савитрининг отаси Бҳодай Прасад 24—25 февраль кунлари бўлиб ўтган воқеалар ҳақида.
Бҳодай Прасаднинг айтишича, у узоқ йиллардан буён мазкур ҳудудда мусулмонлар билан бирга ҳеч қандай муаммосиз яшаб келган.
«Зўравонликлар ортида ким турганини билмаймиз, бироқ улар менинг қўшниларим эмас. Ҳиндуийлар ва мусулмонлар ўртасида ҳеч қандай душманлик йўқ», — дейди у.
Савитри тўйдан олдинги одат сифатида қўлига хина қўйиши керак бўлган 24 февраль куни кечқурун тартибсизликлар ва зўравонликлар авж олган эди.
«Бизга ташқаридан жуда кўп шовқин эшитилди, бироқ мен хина қўярдим ва эртага ҳаммаси тинчийди, деб умид қилардим», — дейди қиз. Вазият эса тескари тус олган ва ёмонлашган.
Савитрининг отаси куёвга ва унинг оиласига уларнинг уйига келиш жуда хавфли эканлигини айтган.
«Биз унинг учун қайғуряпмиз, уларнинг қизи бахтли бўлиши керак бўлган кунда уйида йиғлаб ўтиради, деб ким ҳам ўйлаганди», — дейди мусулмон қўшнилардан бири Самина Бегум.
Тўқнашувлар 26 февраль, чоршанба куни, секинлашган, бироқ савдо дўконлари ёпиқ бўлган ва одамлар тўқнашувлардан қўрқиб, уйидан чиқмаган. Савитрининг отаси айтишича, у кичик маросим ўтказишга қарор қилган.
«Ҳиндуий ёки мусулмон бўладими, ҳаммамиз инсонмиз ва барчамиз зўравонликлардан даҳшатдамиз. Бу уруш динга боғлиқ эмас эди, бироқ у шундай бўлмоқда», — дейди Савитрига тўй кўйлагини кийишда ёрдам берган унинг амакиваччаси Пужа.
Куёв келинникига келганда ҳамда тўй маросими бўлиб ўтаётган вақтда мусулмон қўшнилар икки ёшга бахт тилаш учун йиғилган. Ҳиндуий руҳоний муқаддас шеър ўқиган, куёв ва келин уй ичида ёқилган олов атрофида айланган.
«Биз ҳиндуий акаларимиз билан тинч яшамоқдамиз. Биз улар учун ҳамма нарсамиз. Доим шундай бўлган. Биз бу ерда улар учун турибмиз», — дейди уйнинг ташқарисида бир неча киши билан бирга қўриқчилик қилиб турган Амир Малик исмли мусулмон эркак.
Маросим тугагач, келин-куёв ҳамда куёвнинг оиласи қўшнилар ва келиннинг оиласи томонидан кўчадан кузатиб қўйилган.
«Бугун қариндошларимиздан ҳеч ким қизимнинг тўйида иштирок эта олмади. Бироқ мусулмон қўшниларимиз шу ерда. Улар бизнинг оиламиз», — деди Бҳодай Прасад.
Изоҳ (0)