Hindiston poytaxti Nyu-Deli shahrida musulmonlar va hinduiylik dini vakillari o‘rtasida yuz berayotgan qonli to‘qnashuvlar sababli musulmonlar ko‘pchilikni tashkil qiladigan hududda yashovchi hinduiylik dini vakili bo‘lgan oila o‘z qizining nikoh to‘yini bekor qilishga majbur bo‘ldi. Bu haqda Reuters xabar berdi.
Turmushga chiqishi kerak bo‘lgan 23 yoshli qiz Savitri Prasadning aytishicha, 25-fevral, seshanba kuni, uning nikoh to‘yi bo‘lishi kerak edi. Biroq shu kuni uning ko‘chasida yuz bergan to‘qnashuvlar sababli qiz to‘y ko‘ylagida bezangan holda uyida yig‘lab o‘tirgan.
Biroq to‘qnashuvlarning ertasi kuni to‘yni o‘tkazgan Savitrining otasiga ko‘ra, musulmon qo‘shnilar uning oilasidek bo‘lib qolgan hamda u musulmonlar bilan birga ekanligidan xursand bo‘lgan.
Savitri to‘y marosimi kuni uning uyiga tashrif buyurgan Reuters muxbirlariga “Mening musulmon akalarim bugun meni himoya qilmoqda”, — deb aytgan hamda uning oilasi va qo‘shnilari uni yupatgani uchun yana yig‘lab yuborgan.
Urf-odatlar Chand Ba tumanidagi tor ko‘chada joylashgan Savitrining uyida bo‘lib o‘tgan. Bir necha qadam naridagi asosiy ko‘cha urush maydoniga o‘xshaydi, mashinalar yoqilgan va do‘konlar vayron qilingan, musulmonlar ibodatxonasi yoqib yuborilgan, uning oldidagi maydon to‘qnashuvchi ikki tomon bir-biriga uloqtirgan toshlar bilan to‘lgan.
Joriy haftada Chand Ba va Dehlining boshqa hududlarida yuz bergan to‘qnashuvlarda kamida 32 kishi halok bo‘lgan. Yuzlab hinduiylar va musulmonlar so‘nggi 10 kunlikda mamlakat poytaxtida yuz bergan tartibsizliklarda jarohat olgan.
“Ayvonga chiqdik hamda tutunni, juda ko‘p tutunni ko‘rdik. Bu dahshatli edi, biz tinchlikni xohlaymiz”, — deb gapiradi Savitrining otasi Bhoday Prasad 24—25-fevral kunlari bo‘lib o‘tgan voqealar haqida.
Bhoday Prasadning aytishicha, u uzoq yillardan buyon mazkur hududda musulmonlar bilan birga hech qanday muammosiz yashab kelgan.
“Zo‘ravonliklar ortida kim turganini bilmaymiz, biroq ular mening qo‘shnilarim emas. Hinduiylar va musulmonlar o‘rtasida hech qanday dushmanlik yo‘q”, — deydi u.
Savitri to‘ydan oldingi odat sifatida qo‘liga xina qo‘yishi kerak bo‘lgan 24-fevral kuni kechqurun tartibsizliklar va zo‘ravonliklar avj olgan edi.
“Bizga tashqaridan juda ko‘p shovqin eshitildi, biroq men xina qo‘yardim va ertaga hammasi tinchiydi, deb umid qilardim”, — deydi qiz. Vaziyat esa teskari tus olgan va yomonlashgan.
Savitrining otasi kuyovga va uning oilasiga ularning uyiga kelish juda xavfli ekanligini aytgan.
“Biz uning uchun qayg‘uryapmiz, ularning qizi baxtli bo‘lishi kerak bo‘lgan kunda uyida yig‘lab o‘tiradi, deb kim ham o‘ylagandi”, — deydi musulmon qo‘shnilardan biri Samina Begum.
To‘qnashuvlar 26-fevral, chorshanba kuni, sekinlashgan, biroq savdo do‘konlari yopiq bo‘lgan va odamlar to‘qnashuvlardan qo‘rqib, uyidan chiqmagan. Savitrining otasi aytishicha, u kichik marosim o‘tkazishga qaror qilgan.
“Hinduiy yoki musulmon bo‘ladimi, hammamiz insonmiz va barchamiz zo‘ravonliklardan dahshatdamiz. Bu urush dinga bog‘liq emas edi, biroq u shunday bo‘lmoqda”, — deydi Savitriga to‘y ko‘ylagini kiyishda yordam bergan uning amakivachchasi Puja.
Kuyov kelinnikiga kelganda hamda to‘y marosimi bo‘lib o‘tayotgan vaqtda musulmon qo‘shnilar ikki yoshga baxt tilash uchun yig‘ilgan. Hinduiy ruhoniy muqaddas she’r o‘qigan, kuyov va kelin uy ichida yoqilgan olov atrofida aylangan.
“Biz hinduiy akalarimiz bilan tinch yashamoqdamiz. Biz ular uchun hamma narsamiz. Doim shunday bo‘lgan. Biz bu yerda ular uchun turibmiz”, — deydi uyning tashqarisida bir necha kishi bilan birga qo‘riqchilik qilib turgan Amir Malik ismli musulmon erkak.
Marosim tugagach, kelin-kuyov hamda kuyovning oilasi qo‘shnilar va kelinning oilasi tomonidan ko‘chadan kuzatib qo‘yilgan.
“Bugun qarindoshlarimizdan hech kim qizimning to‘yida ishtirok eta olmadi. Biroq musulmon qo‘shnilarimiz shu yerda. Ular bizning oilamiz”, — dedi Bhoday Prasad.
Izoh (0)