Ўзбекистон Ички ишлар вазирлиги ва ҳудудий бошқармалар тизимида бир қатор тайинловлар амалга оширилди. Бу ҳақда вазирлик томонидан хабар берилди.
Маълум қилинишича, Қорақалпоғистон Республикаси ички ишлар вазирининг жамоат тартибини сақлаш бўйича ўринбосари, подполковник Омонбой Ўринбоев Ўзбекистон Республикаси ИИВ Патруль-пост хизмати ва жамоат тартибини сақлаш бош бошқармаси бошлиғининг биринчи ўринбосари — жамоат тартибини сақлашни ташкиллаштириш бошқармаси бошлиғи лавозимига тайинланди.
Вазирликнинг хабар беришича, у 2019 йилнинг мартидан буён Қорақалпоғистон Республикаси ички ишлар вазирининг жамоат тартибини сақлаш бўйича ўринбосари лавозимида ишлаб келаётганди.
Ички ишлар вазирининг буруғига асосан, полковник Музаффар Муҳаммаджонов ИИВ Назорат-тафтиш инспекцияси бошлиғи лавозимига тайинланган. Тайинловга қадар Музаффар Муҳаммаджонов Сирдарё вилояти ИИБ бошлиғининг ўринбосари — молия ва моддий-техника таъминоти бошқармаси бошлиғи лавозимида фаолият юритган.
Подполковник Азимжон Холиқов Бухоро вилояти ИИБ бошлиғининг жамоат тартибини сақлаш бўйича ўринбосари лавозимига тайинланди. Тайинловга қадар Азимжон Холиқов Бухоро тумани ички ишлар бўлими бошлиғи лавозимида ишлаб келаётган эди.
Подполковник Шерзод Ибрагимов Навоий вилояти ИИБ бошлиғининг жамоат тартибини сақлаш бўйича ўринбосари лавозимига тайинланди. Бунга қадар у Навоий вилояти ИИБ Патруль-пост хизмати ва жамоат тартибини сақлаш бошқармаси бошлиғи лавозимида ишлаган.
Подполковник Ҳабибулла Ғозиев Сирдарё вилояти ИИБ бошлиғининг ўринбосари — молия ва моддий-техника таъминоти бошқармаси бошлиғи лавозимини эгаллади. Ҳабибулла Ғозиев янги лавозимга ўтишидан олдин ИИВ Молия ва моддий-техника таъминоти бош бошқармаси, Молия-иқтисод бошқармасида Иш ҳақини меъёрлаш бўлими бошлиғи лавозимида ишлаган.
Полковник Исмоил Ҳимматов Сурхондарё вилояти ИИБ бошлиғининг ўринбосари — молия ва моддий-техника таъминоти бошқармаси бошлиғи лавозимига тайинланди. Тайинловга қадар Исмоил Ҳимматов ИИВ Ҳуқуқбузарликлар профилактикаси бош бошқармаси, Вояга етмаганлар ва ёшлар ўртасида ҳуқуқбузарликлар профилактикаси фаолиятини ташкил этиш ҳамда жамоатчилик уюшмалари билан ҳамкорлик қилиш бошқармаси, Жамоат уюшмалари билан ҳамкорлик қилиш бўлими бошлиғи лавозимида фаолият олиб борган.
Изоҳ (0)