26 февраль, чоршанба куни, Тошкент шаҳри ва Тошкент вилояти ҳудудида яширин фаолият олиб борган халқаро террористик ташкилот ва экстремистик оқим таъсирига тушган 21 кишининг ноқонуний фаолиятига чек қўйилди. Бу ҳақда Ўзбекистон Ички ишлар вазирлиги хабар берди.
Маълум қилинишича, мазкур шахслар Тошкент шаҳри ва Тошкент вилояти ҳудудида ноқонуний диний йиғилишлар ўтказиб, унда Суриядаги халқаро террористик ташкилотлар ғояларини тарғиб қилган. Шунингдек, улар мазкур ташкилотлар фаолиятини қўллаб-қувватлаб, ушбу ташкилотлар сафига бориб қўшилишни режалаштирган
Ушбу ҳолат юзасидан Ўзбекистон Республикаси Жиноят кодексининг 244-2-моддаси 1-қисми (Диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) билан жиноят иши қўзғатилган. Жиноят иши доирасида Тошкент шаҳри ва вилояти ҳудудидаги 24 та манзилда тинтув тадбирлари ўтказилган ҳамда 21 киши қўлга олинган.
Қайд этилишича, ушбу шахсларнинг яшаш манзилларидан жиноятга алоқадор бўлган ашёвий далиллар топилган ҳамда қонуний тартибда расмийлаштирилиб олинган. Тергов-суриштирув ишлари давом эттирилмоқда.
Аввалроқ Тошкентда «Тавҳид ва жиҳод катибаси» халқаро террористик ташкилотига алоқадор бўлган 21 киши қўлга олинган эди. Шунингдек, Ўзбекистон Ички ишлар вазирлиги ва Давлат хавфсизлик хизмати ходимлари томонидан Тошкентда 2019 йилнинг октябрь ойида ҳамда 2020 йилнинг бошида «Жиҳодчилар» диний-экстремистик оқимининг иккита гуруҳи аъзолари қўлга олинган эди.
Изоҳ (0)