Навоийда онанинг буйраги фарзандига, ўғилнинг буйраги отасига ўтказилди. Операциядан сўнг вилоят ҳокими беморлар ҳолидан хабар олди

Навоий вилоятида 22 февраль, шанба куни, ҳудуд тарихида илк бор буйрак кўчириб ўтказиш бўйича операциялар амалга оширилди, дея хабар бермоқда «Xabar.uz».

Вилоятдаги кўп тармоқли тиббиёт маркази бош врачи М.Аҳмедов раҳбарлигида уролог-трансплантолог А.Шодиев, қон-томир жарроҳи А.Сафаров, нефролог Ш.Муҳаммадиевдан иборат шифокорлар томонидан беморлар операцияга тайёрланган.

Буйрак кўчириш амалиёти академик В.Воҳидов номидаги Республика ихтисослаштирилган жарроҳлик илмий-амалий тиббиёт марказининг етук трансплантолог мутахассислари — профессор Фазлиддин Баҳриддинов ва илмий ходимлар Зоҳиджон Маткаримов, Илёс Аблялимов, Азамат Суюмов билан биргаликда муваффақиятли амалга оширилди.

Маълум бўлишича, Сурхондарё вилояти Ангор туманида яшовчи 49 ёшли Дилором Шодиева фарзанди 21 ёшли Сирожиддин Алиевга ҳамда Нурота туманида яшовчи 27 ёшли Аббос Тўхтаев эса отаси 58 ёшли Бахтиёр Назаровга донорлик қилиб, буйрагини берган.

«25 февраль куни Навоий вилояти ҳокими Қобул Турсунов марказга келиб, буйрак кўчириб ўтказиш операциясини бошидан кечирган беморлар ҳолидан хабар олган», — дейилади хабарда.

Маълумот учун, ҳозирда Навоий вилоятида 75 нафар бемор сурункали буйрак етишмовчилиги сабабли режали гемодиализ сеансини олади ва тиббий нуқтаи назардан ушбу беморларнинг барчаси буйрак кўчириб ўтказишга муҳтож.