Straus House МЧЖ таъсисчиси Иброҳим Исроилов ва компаниянинг бошқа мансабдор шахсларига нисбатан қўзғатилган жиноят иши бўйича дастлабки суд мажлиси 27 февраль, пайшанба куни, соат 10:30 да жиноят ишлари бўйича Яккасарой туман суди биносида бошланади. Бу ҳақда Олий суд матбуот хизмати хабар берди.
Маълум қилинишича, судланувчилар — Straus House МЧЖ таъсисчиси Иброҳим Исроилов, компания директори А.Маҳмудалиев, директор ўринбосари Д.Қутпиддинов ва бош ҳисобчи О.Саидовга нисбатан жиноят ишини кўриб чиқиш бўйича очиқ суд жараёни бўлиб ўтади.
Мавзуга доир: Straus House раҳбари Иброҳим Исроилов қамоққа олинди
Хабар берилишича, судланувчи Иброҳим Исроилов Ўзбекистон Республикаси Жиноят кодексининг 168-моддаси (фирибгарлик) 3-қисмининг «б» банди, 4-қисмининг «а», «в» бандлари, 184-моддаси (солиқлар ёки бошқа мажбурий тўловларни тўлашдан бўйин товлаш) 3-қисми, 189-моддаси (савдо ёки хизмат кўрсатиш қоидаларини бузиш) 1-қисми, 243-моддаси (жиноий фаолиятдан олинган даромадларни легаллаштириш), 227-моддаси (ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш) 2-қисмининг «а» банди ва 238-моддаси (ёлғон гувоҳлик бериш) 3-қисмининг «а» банди билан айбланувчи тариқасида жиноят ишида иштирок этишга жалб қилинган ва унга нисбатан қамоққа олиш эҳтиёт чораси қўлланган.
Судланувчилар А.Маҳмудалиев, Д.Қутпиддинов ва О.Саидовга нисбатан ҳам Жиноят кодексининг тегишли моддалари билан айбланувчи тариқасида жиноят ишида иштирок этишга жалб қилинган ва уларга нисбатан гаров эҳтиёт чораси қўлланган.
Маълум қилинишича, ушбу жиноят иши бўйича 300 дан ортиқ жабрланувчи ва фуқаровий даъвогар мавжуд.
Айблов хулосаси бўйича моддий зарар миқдори 7,9 миллиард сўмдан ортиқ (7 906 800 200 сўм) бўлиб, шундан дастлабки тергов мобайнида 1,8 миллиард сўмдан ортиқ (1 845 800 000 сўм) миқдорини қайтариш чораси кўрилган.
Таъкидланишича, дастлабки терговда хатланган Lacetti, Spark ва Malibu русумли автомашиналар баҳоланган ҳамда Юнусобод тумани Кулолқўрғон кўчасида жойлашган хонадонга тақиқ қўйилган.
Таъкидланишича, жабрланувчилар кўплиги ва турли ҳудудлардан бўлгани сабабли уларнинг суд мажлисларида иштирок этиши яшаш жойларидаги судлар биноларида ўрнатилган видеоконференцалоқа тизими орқали таъминланади.
Аввалроқ Straus House жабрланувчилари тергов тугаганига қарамай, суд бошланмаётганидан норози бўлиб, ҳукуматдан ёрдам сўраб Вазирлар Маҳкамаси олдида тўпланган эди. Унгача, Ички ишлар вазирлиги Straus House’дан жабрланганларни ҳудудлардаги тергов бўлимларига мурожаат қилишга чақирган.
Изоҳ (0)