Қозоғистон мамлакат ҳудудидан йирик шохли қорамолларни олиб чиқишни тақиқлагани ва бунинг сабабларидан бири Ўзбекистон бўлгани ҳақида хабар берилган эди. 2019 йилда Қозоғистондан 156 минг бош йирик шохли қорамол олиб чиқиб кетилган. Шундан 78 фоизи Ўзбекистон улушига тўғри келган.
Шунингдек, Қозоғистондан қарийб 264 минг бош қўй экспорт қилинган, уларнинг ярмидан кўпи наслли зотлар бўлган. Экспорт қилинган қўйларнинг асосий харидори Ўзбекистон бўлиб, қўшни мамлакатда 200 минг бошдан ортиқ қўй олиб келинган. Шу муносабат билан Қозоғистонда гўшт нархлари тез суръатлар билан ўсишни бошлаган.
Чорва молларини олиб чиқиб кетишга қўйилган тақиқларга қарамай, Қозоғистонда гўшт нархи ошишда давом этмоқда. Январь ойида нархлар бирданига 13 фоизга кўтарилган.
«Forbes.kz»нинг ёзишича, 21 февраль, жума куни, бўлиб ўтган матбуот анжуманида Қозоғистон қишлоқ хўжалиги вазирининг биринчи ўринбосари Айдарбек Сапаров чорва молларини олиб чиқиб кетишга тақиқ қўйилганини тасдиқлади. Шунингдек, Сапаров нархга бошқа кўплаб омиллар таъсир кўрсатишини ҳам қўшимча қилган.
Spot’нинг ёзишича, Ўзбекистонда январь ойида гўшт нархи 2019 йил декабрига нисбатан 0,4 фоизга ошган. Бир нечта компания Қозоғистондаги тақиқ ҳозиргача ҳеч қандай йўқотишга олиб келмаганлигини маълум қилган, аммо бир ой хулоса қилиш учун жуда қисқа эканлигини таъкидлаган.
Эслатиб ўтамиз, 2019 йил июнь ойида Қозоғистон мамлакатдан йирик қорамол олиб кетилишини тақиқлашга қарор қилганди. Бунга уларнинг Ўзбекистонга катта миқдорда етказилгани сабаб бўлган. Август ойига келиб Қозоғистон Ўзбекистонга йирик шохли чорва сотишни тақиқлаш режасидан қисман воз кечди.
Октябрь ойига келиб эса Қозоғистон қишлоқ хўжалиги вазири ва молия вазирининг қўшма қарорига кўра, мамлакат ҳудудидан сигирларни олиб чиқиш тақиқланди. Тақиқ олти ойга жорий этилди ҳамда йирик шохли қорамол, хусусан, бир ёшгача бўлган урғочи бузоқлар, бир ёшдан ошган сигирлар, қўй, эчки ва эчки болаларига тегишли. Қозоғистон мазкур тақиқни ўрнатгач, Ўзбекистон чорва молларини Украинадан олиб келишни бошлади.
Изоҳ (0)