Тошкент шаҳар ҳокими Жаҳонгир Ортиқхўжаев Мисрнинг Elsewedy Electric компанияси директорлар кенгаши раиси Аҳмад ал-Сувейдий бошчилигидаги делегация билан учрашди. Бу ҳақда 21 февраль, жума куни, Тошкент шаҳар ҳокимлиги матбуот хизмати хабар берди.
Аҳмад ал-Сувейдий ўз компанияси ҳақида маълумот берар экан, Elsewedy Electric қайта тикланадиган энергия ишлаб чиқариш учун кабеллар, трансформаторлар, электротехника буюмлари, электр узатиш тармоқларини қуриш ва жиҳозлаш, тарқатиш тизимлари, газ ҳисоблагичларини ишлаб чиқариш бўйича етакчилардан бири эканлигини айтиб ўтган.
Таъкидланишича, ҳозирда компаниянинг Руминия, Греция, Словения, Чехия, Қатар, Жазоир, Сурия, Бангладеш, Танзания, Гана каби мамлакатларда филиаллари бор. «У Тошкентда драйпорт (қуруқликдаги логистика маркази) қуриш, смарт ҳисоблагичлар ишлаб чиқариш ва электр энергияси таъминоти соҳасида биргаликда ишлаш нияти борлигини айтиб ўтди», — дейилади ҳокимлик ахборотида.
Учрашувда ҳоким Жаҳонгир Ортиқхўжаев хорижий меҳмонга Тошкентда амалга оширилиши режалаштирилган қатор лойиҳаларни таклиф қилган. «Мазкур таклифга асосан, компания мутахассислари тегишли тизимларни ўрганишади ва уларнинг хулосаларига кўра, ҳамкорлик истиқболлари белгиланади», — дея қўшимча қилинган шаҳар ҳокимлиги ахборотида.
Изоҳ (0)