Тошкент шаҳридаги Юнусобод метро йўли қурилишида 2019 йилнинг 18 декабрь куни содир бўлган ер ўпирилиши оқибатида ҳалок бўлган Зариф Каримовнинг оила аъзоларига компенсация тўланди. Бу ҳақда «Ўзбекистон темир йўллари» АЖ матбуот хизмати хабар берди.
Маълум қилинишича, ҳодисани тергов қилган махсус комиссия боқувчисини йўқотган Зафар Каримовнинг оила аъзоларига тўланадиган компенсация миқдорини 281 миллион 670 минг 972 сўм этиб белгилаган. Бундан ташқари, Зафар Каримовни дафн этиш маросимининг харажатларини қоплаш учун саккиз миллион сўм ҳамда марҳумнинг қарамоғида бўлган беш нафар оила аъзосининг ҳар бирига 650 608 сўм миқдоридаги ойлик тўлов белгиланган.
Қайд этилишича, тўловлар 12 февраль, чоршанба куни, иш берувчи ва суғурта қилувчи компания «Темирйўлсуғурта» томонидан амалга оширилган.
Махсус комиссия ушбу ҳодисанинг бошқа беш нафар қурбонининг оилаларига ҳам компенсация миқдорларини белгилаб берган, тўловларни улар билан иш шартномасини тузган компания амалга ошириши белгиланган.
Ҳалокатдан сўнг пудратчи-қурувчи ташкилотлар томонидан қурбонларнинг оила-аъзолари ва яқинларига 100 миллион сўмлик дастлабки товон пуллари тўлаб берилган. Шу билан бирга, амалдаги қонунчиликка асосан қўшимча компенсация пуллари тўлаб берилиши маълум қилинган эди.
Эслатиб ўтамиз, мазкур ҳалокат оқибатида олти нафар ишчи қурбон бўлган эди.
Изоҳ (0)