Ўғриликка тенглаштирилган, трансфер ойнаси ёпилган вақтда амалга оширилган «Барселона» хариди — Мартин Брэйтуэйт воқеаси ҳақида

Европада қишки трансферлар ойнаси ёпилиб бўлган. Бироқ «Барселона» жароҳат олган Усмон Дембеленинг ўрнига «Леганес» ҳужумчиси Мартин Брэйтуэйтни сотиб олганини эълон қилди. Ушбу трансфер қандай рўй берганини тушунтиришга ҳаракат қиламиз.

* Брэйтуэйт — Ла Лигада қолиш учун курашаётган «Леганес» (19-ўринда) сафида жорий мавсум 24 та турнинг барчасида қатнашди. У 6 та гол билан клубнинг энг яхши тўпурари бўлиб турганди.

* «Барселона» даниялик ҳужумчи учун «Леганес»га 18 миллион евро тўлайди

Брэйтуэйтнинг клуб билан тузган шартномасида айнан шу маблағ товон пули сифатида кўрсатилган. «Леганес» Каталония клубидан Мартин бўйича таклиф келиб тушган вақтда аввалига музокараларга киришишдан бош тортди. Клуб президенти Фелипе Морено қуйидагича баёнот берди: «Товон пулини тўланг ёки Брэйтуэйт биз билан қолади».

* Трансфер ойнаси ёпилган бўлса-да, «Барселона» қандай қилиб харидни амалга оширди?

Усмон Дембеле сафга қайтганига кўп бўлмасидан яна жароҳат олди. Шифокорлар эса текширувлардан сўнг у камида 5 ой майдонда бўлмаслигини тасдиқлади. Дембеле учун мавсум якунланди. «Барселона» эса Ла Лиганинг махсус комиссиясига Дембеленинг жароҳати ҳақидаги маълумотларни тақдим этди. Ла Лига қоидаларига кўра, клуб жароҳатланган футболчининг ўрнига фақат Испания чемпионатида тўп тепадиган футболчини ўз сафига қўшиб олиши мумкин бўларди. У евроаренада ўйнай олмайди ва фақат ички биринчиликда ҳаракат қилади. Ла Лига «Барселона»га рухсат берди.

* Ла Лига «Леганес»га Брэйтуэйтнинг ўрнига футболчи олиб келишга рухсат бермади

Ла Лигада 4-мавсумини ўтказаётган «Леганес» Мартиннинг ўрнига янги футболчи олиб келиш учун лига раҳбариятига хат йўллаб, рад жавобини олди. Жамоанинг асосий ҳужумчисини трансфер ойнаси ёпилган вақтда сотиб олишди, унинг ўзига эса бунга рухсат берилмади.

Қайд этиш жоиз, январда клуб яна бир футболчиси — Юссуф ан-Носиридан айрилган эди. «Севилья» ан-Носирининг шартномасида кўрсатилган товон пулини тўлади ва уни олиб кетди.

«Леганес» деярли ҳужумчисиз қолди.

* Футболчисининг кетишини эълон қилган «Леганес» Ла Лиганинг трансферларга таъсири ҳақида бонг урди

«Бу саволни ўртага ташлашни хоҳлаймиз. Ўзимизга жиддий ва катта зарар берадиган ҳолатга тушиб қолдик. Бу қандай қоида бўлди?! Узоқ муддатга футболчисидан айрилган клуб бир томонлама ўз муаммосини ҳал қилиши мумкин экан-да! Унинг муаммоси эса бошқа клуб бўйнида шундайми? Мазкур қоидани клублар ўзаро келишган ҳолатда амал қилганда тушунардик, бироқ ахир бу клубларнинг тенглиги қоидаларига зид-ку. Ушбу ҳолатни, таърифлаб бўлмас даражада катта зарарларни камайтириш учун охиригача боришга тайёрмиз. Регламентдаги мазкур қоидани адолатсиз ҳисоблаймиз. Фойда кўрган «Барселона», жабрланган эса «Леганес» бўлди», — дея баёнот берди Мартин Ортега.

«Албатта, маълум қоидалар бор. Аммо клублар ушбу қоида бўйича қандай ҳаракат қилишни ўзлари ҳал этади. «Барселона» эса этика қоидаларини очиқ-ойдин равишда бузди. Каталонларнинг бу иши улкан ўғирликлар даврини ёдга солмоқда. Гап қоидаларга амал қилишда эмас, балки принципсиз клубга айланиш ҳақида кетмоқда. Ушбу ҳолатдан сўнг футбол жамоатчилиги «Барселона»ни аввалгидек қабул қилади деб ўйламайман. Бу спорт нуқтаи назари билан қаралганда шубҳали трансфер, молиявий томондан эса аҳмоқона», — дея ёзади Роберто.

Боиси «Леганес»да атиги бир нафар соф ҳужумчи қолди — Гидо Каррило. Гидо майдонга жуда кам тушади ва сермаҳсул эмас. Жамоада бошқа вариантлар ҳам бўлиши мумкин, бироқ қолган ҳужумкор футболчилар битта ҳам гол ургани йўқ. Буни қуйидагича тушунтиришга ҳаракат қиламиз: Брэйтуэйт ва ан-Носирини ҳисобга олмаса, «Леганес»нинг атиги 4 нафар футболчиси Ла Лигада гол урган. Голлардан 5 таси ярим ҳимоячи Оскар Родригесга тегишли.

* Мартин Брэйтуэйт ишини Али Дурсун ҳал қилди. У ким?

У Френки де Йонгни «Барселона»га олиб келган агентликда фаолият олиб боради. Таъкидлаш жоиз, де Йонг билан бирга ўтган ёзда Дурсуннинг ўғли Майк ван Бейнен ҳам Каталония клубига ўтганди. Бироқ у «Барселона»нинг иккинчи жамоасида битта ҳам ўйин ўтказмасдан, қишки трансферлар вақтида «Генчлербирлиги» клубига «бадарға» бўлди.

* «Барселона»нинг режаси

Луис Суареснинг жароҳатидан ҳеч қанча ўтмай, «Барселона» клуб тарбияланувчиси бўлган ҳужумчи Абель Руисни «Брага»га ижарага бериб юборди. «Брага» мавсум сўнгида Руисни 8 миллион еврога тўлиқ сотиб олиш ҳуқуқини ҳам қўлга киритди («Леганес» Мартин Брэйтуэйтни «Мидлсборо»дан 5 миллион еврога харид қилган). Бироздан кейин Каталония клуби ҳужум чизиғининг иккала қанотида ҳам ўйнашга қодир бўлган Карлес Пересни «Рома»га ижарага берди-қўйди. Мантиқни қаранг: 31 январда ҳужумчисини қўйиб юбориш ва орадан бир неча кун ўтиб трансферга рухсат сўраш.

* Брэйтуэйт — ёздаёқ «Барселона»га керак бўлмай қолиши мумкин

Тез орада Луис Суарес сафга қайтади, ёзда эса Усмон Дембеле ҳам жароҳатдан тузалади. «Барселона» Дурсун билан музокараларда Мартиннинг трансфери фавқулодда ҳолат эканлигини тушунтирган. Агар футболчи каталонияликларни ўз ўйини билан хурсанд қила олмаса, у сотиб юборилади. Аммо «Барселона» футболчига сарфланган 18 миллион еврони ортга қайтара олмаслигини ҳам тушуниб турибди.

Бироқ Каталония клуби Брэйтуэйтга харидор чиқишига ишонмоқда. Бу гап қаердан чиқди дерсиз? Дурсунга кўра, қишки трансферлар вақтида «Леганес»га Брэйтуэйт бўйича АПЛнинг бир неча клуби таклиф билан чиққан. Лекин «Леганес» ҳужумчисини сотишни истамаган.

Каталониянинг Diario Sport нашрида 89 фоиз мухлис Брэйтуэйт трансферини ўйланмай амалга оширилган харид сифатида баҳолади. Шу билан бирга редакциянинг ўзи эълон қилган мақоласида Мартинни «даниялик Роналдо» сифатида эътироф этди.

* «Мидлсборо» эса хурсанд

Брэйтуэйтнинг трансферидан фақатгина футболчининг аввалги клуби «Мидлсборо» хурсанд бўлмоқда. Инглиз қайта сотувдан 4,5 миллион еврога эга бўлмоқда. Эслатиб ўтамиз, 2019 йил ёзида «Боро» футболчи учун «Леганес»дан 5 миллион еврони қуртдек санаб олганди.