Таниқли кувайтлик блогер ва жамоат арбоби Салва ал-Мотирий коронавирусни даволаш бўйича гўёки ўзи яратган усул учун бир миллиард Кувайт динори (3,2 миллиард доллар) талаб қилди. Блогер ўз ишини Кувайтдаги Хитой элчихонасига олиб келган. Бу ҳақда «РИА Новости» хабар берди.
Блогер Snapchat орқали эълон қилган видеосида Хитой элчихонаси олдида эканлигини айтган ва Хитой элчиси номига ёзилган хатни кўрсатган.
Хитой элчихонаси олдига боришдан олдин блогер ўзининг YouTube’даги каналига видео жойлаган. Видеода у ўзи ишлаб чиққан коронавирусни даволаш усули учун унинг банкдаги ҳисобрақамига бир миллиард Кувайт динори ўтказишни талаб қилган. Мазкур видео фойдаланувчиларнинг қизғин муҳокамаларига сабаб бўлган.
Шу тариқа, блогер хитойлик актёр Жеки Чаннинг коронавирус давосини топган кишига бир миллион юань (143 минг доллар) мукофот бериши ҳақидаги ваъдасига жавоб қайтарди.
Аввалроқ Жеки Чан коронавирусга қарши вакцина яратган инсонга 143 минг доллар ваъда қилган. Жаҳон соғлиқни сақлаш ташкилоти бош ижрочи директори Сумия Сваминатан COVID-19 коронавирусига қарши вакциналарни инсонда синовдан ўтказиш тўрт-беш ойдан сўнг бошланишини маълум қилганди. Экспертлар эса коронавирусга қарши биринчи вакцина 18 ойдан кейин пайдо бўлиши мумкинлигини айтган. Хитой компанияси эса коронавирус инфекциясига қарши потенциал вакцина сотувга чиқишини эълон қилди. Гонконг эса коронавирусга қарши вакцина яратилганини маълум қилган эди.
Сўнгги маълумотларга кўра, Хитойда коронавирус оқибатида вафот этганлар сони 2 минг кишидан ошиб кетган.
Изоҳ (0)