Нур-Султонда қор бўронлари сабаб мактабларда дарслар бекор қилинди, трассалар ёпилди

Қозоғистон пойтахти Нур-Султонга ёпирилган қон бўрони сабаб мактаблардаги дарслар бекор қилинди, деб хабар беради Tengrinews.

Шаҳар таълим бошқармасининг маълум қилишича, об-ҳавонинг ёмонлашгани сабаб мактабларнинг биринчи сменасида ўқиётган 11-синфгача бўлган ўқувчилар ҳамда коллежларнинг 1, 2-курс талабалари учун дарслар бекор қилинган.

Пойтахт Фавқулодда вазиятлар департаментининг маълумотларига кўра, ноқулай об-ҳаво шароити сабаб Нур-Султон—Шучинск, Нур-Султон—Отбосар ва Нур-Султон—Қарағанда трассалари ёпилган.

Фавқулодда вазиятлар қўмитаси фуқароларга 18—19 февраль кунлари Қозоғистон пойтахтида кучли қор бўрони кутилаётгани ҳақида SMS хабарлар жўнатган. Бунда шамол тезлиги сониясига 23 метрга етиши кутилмоқда.