АҚШ президенти Дональд Трамп Twitter’даги чиқишлари мамлакат бош прокурори Уильям Баррнинг ишига халақит бериши мумкинлигини тан олди. Бу ҳақда «РИА Новости» хабар бермоқда.
«Мен чиндан ҳам унинг ишини қийинлаштиряпман, бунга қўшиламан. Бироқ президентнинг кўриб чиқилаётган жиноий ишларга аралашишга тўлиқ ваколати бор», — деди Трамп.
Олдинроқ Барр ABC News телекомпаниясига берган интервьюсида президент ўз твитлари билан унга ишлашда халақит бераётганидан нолиганди. Бош прокурор Трампнинг оғайниси Рожер Стоун иши бўйича қатор баёнотларидан сўнг шундай муносабат билдирди.
Прокурорлар судга Стоунни 7 йилдан 9 йилгача бўлган муддатга қамоқ жазоси тайинлашни таклиф қилганди. Бироқ Трамп Twitter’да буни адолатсиз деб айтганидан сўнг адлия вазирлиги мазкур талабларга қўшилмаслигини билдирди.
Маълумот учун, Рожер Стоун конгрессга қасамёд остидаги кўрсатмалар давомида ёлғон ишлатганлик ва конгресс текширувига қаршилик қилишда айбланганди.
Изоҳ (0)