Россиянинг Санкт-Петербург шаҳри соғлиқни сақлаш қўмитаси Боткин номидаги шаҳар клиник шифохонасининг бош шифокори Алексей Яковлевни ишдан бўшатди. Бу ҳақда Meduza хабар берди.
Маълум бўлишича, бош шифокорнинг ишдан бўшатилиши иш берувчининг ташаббуси билан амалга оширилган. Шифохонанинг вақтинча раҳбари этиб Иван Федуняк тайинланган.
Қўмита матбуот хизмати бош шифокорнинг ишдан бўшатилганини тасдиқлаган, бироқ унинг сабабларини маълум қилмаган.Февраль ойининг бошида мазкур шифохонага бир нечта бемор мажбурий тартибда карантинга жойлаштирилган. Мазкур кишилар Хитойдан қайтганидан кейин уларда коронавирус бўлиши мумкинлиги гумон қилинган. Тўрт нафар бемор ўзбошимчалик билан муассасадан кетиб қолган, кейинчалик уларнинг икки нафари ўз ихтиёри билан шифохонага қайтиб келган. Беморлардан бири, Алла Ильинага нисбатан маъмурий иш очилган. Суд уни мажбурий тартибда шифохонага қайтариш ҳақида қарор чиқарган.
Мавзуга доир: Петербург суди коронавирус бўйича карантиндан қочиб кетган аёлни касалхонага мажбуран ётқизишга рухсат берди
Аввалроқ Россия коронавирус бўйича карантинни бузувчиларга нисбатан жазони кучайтириши ҳақида хабар берилган эди.
Эслатиб ўтамиз, коронавирус сабаб карантинда турган Diamond Princess кемасининг йўловчилари қирғоққа чиқа бошлади. Ўзбекистонда эса 4—6 февраль кунлари Пекин ва Ухандан олиб келинган фуқаролар «Бўстон» санаторийсидаги 14 кунлик карантиндан кейин ўз уйларига йўл олди. Уларнинг ҳеч бирида коронавирус аниқланмади.
Сўнгги маълумотларга кўра, Хитойда коронавирус оқибатида вафот этганлар сони 2 минг кишидан ошиб кетди.
Изоҳ (0)