Sud 2018-yilning yozida Toshkent shahridagi Aurum-898 tungi klubida o‘ldirilgan Jamshid Kenjayevning oilasiga ayblanuvchilardan jami 300 mln so‘m ma’naviy zarar undirish to‘g‘risida hukm chiqardi.
Fuqarolik ishlari bo‘yicha Mirzo Ulug‘bek tumanlararo sudida Aurum-898 tungi klubida o‘ldirilgan sportchi Jamshid Kenjayevning turmush o‘rtog‘i Olisya Mirzomurodovaning boquvchisini yo‘qotgani sababli yetkazilgan zarar, moddiy va ma’naviy zarar undirish haqidagi da’vo arizasi bo‘yicha ish ko‘rib chiqildi.
Sudning 2020-yil 17-yanvardagi hal qiluv qaroriga ko‘ra, javobgar Shodali Qilichovdan da’vogar Olesya Mirzomuradova va Yoqubjon Kenjayev (marhumning otasi) foydasiga jinoyat natijasida yetkazilgan ma’naviy zarar uchun 250 million so‘m miqdorida kompensatsiya undirilishi belgilangan.
Shuningdek, javobgarlar Alijon Hamrayev, Jahongir Yorqulov va Saidazim Kamolidinovdan solidar tartibda marhumning yaqinlari foydasiga jinoyat natijasida yetkazilgan ma’naviy zarar uchun 50 million so‘m kompensatsiya undirilishi belgilangan.
Bundan tashqari, hal qiluv qaroriga muvofiq, javobgar Shodali Qilichovdan da’vogar Olesya Mirzomuradova foydasiga boquvchisini yo‘qotganligi sababli yetkazilgan zararni qoplash uchun 2018-yil 27-fevralda tug‘ilgan Aisha ismli farzandining 18 yoshga to‘lguniga qadar har oyda bazaviy hisoblash miqdorining 5 barobarining 1/3 qismi (taxminan 372 ming so‘m) miqdorida zarar undirib boriladi.
Ishni ko‘rib chiqqan sudya Olimjon Shamsiyevning ma’lum qilishicha, hal qiluv qarori joriy yilning 7-fevral kuni kuchga kirgan va undiruvni ta’minlash uchun ijro varaqalari chiqarilib, Majburiy ijro byurosining tegishli bo‘limlariga yuborilgan.
Eslatib o‘tamiz, 2018-yilning 8 dan 9-avgustiga o‘tar kechasi, chamasi soat 00:25 larda Yunusobod tumanidagi Aurum 898 tungi klubi oldida janjal oqibatida erkin kurash bo‘yicha xalqaro toifadagi sport ustasi 25 yoshli Jamshid Kenjayev pichoqbozlik oqibatida vafot etgan.
Mavzuga doir:
- Sportchi Jamshid Kenjayevning o‘limiga tungi klubga o‘zi olib kelgan pichoq sabab bo‘lgan
- Toshkentdagi Aurum 898 tungi klubidagi mushtlashuv videosi paydo bo‘ldi (video)
- Toshkentda “Aurum 898” tungi klubida o‘ldirilgan sportchi Jamshid Kenjayev ishi bo‘yicha sud boshlandi
- Jamshid Kenjayevni o‘ldirganlikda gumonlanayotgan Shodali Qilichov: Uni o‘ldirishni xohlamagandik
- “Marhum qiynalib o‘lgan”. Tibbiy ekspert Jamshid Kenjayev ishi bo‘yicha sudda nimalar dedi?
Keyinchalik Jamshid Kenjayev o‘ldirilgan tunda uning yonida bo‘lgan o‘rtoqlaridan biri Sh.T.ga yetkazilgan jarohatlar yuzasida sud majlisi bo‘lib o‘tgan. Sudlanuvchi sifatida qatnashgan Aurum-898 tungi klubining qo‘riqchisi M.A.ga nisbatan sud hukmi o‘qilib, u jinoyat kodeksining 277-moddasi (Bezorilik) 3-qismi “g” bandi bilan aybli deb topilgan va unga 5 yil muddatga ozodlikni cheklash jazosi tayinlangandi.
Izoh (0)