Ўзбекистон Фавқулодда вазиятлар вазирлиги Академиянинг 5-босқич курсанти Наманган вилоятида каналда оқиб кетаётган фуқарони қутқариб қолди. Бу ҳақда вазирлик томонидан хабар берилди.
Маълум қилинишича, 2020 йилнинг 3 февраль кунидан 29 февраль кунига қадар республиканинг барча вилоятларида Фавқулодда вазиятлар вазирлиги Академиясининг 5-босқич курсантлари малакавий амалиётни ўтамоқда. Амалиёт давомида улар белгиланган объектлар ва аҳоли ўртасида тарғибот-ташвиқот ишларини олиб бормоқда.
Наманган вилояти фавқулодда вазиятлар бошқармасида амалиётни ўтаётган 5-босқич курсанти Бобур Аббосов Уйчи тумани «Беруний» МФЙ ҳудудидаги каналда оқиб кетаётган одамни кўриб қолган. Зудлик билан ёрдамга шошилган курсант қисқа муддат ичида фуқарони соғ-саломат сувдан олиб чиққан.
Ҳолат юзасидан тезкор хабар бериб, кўнгилсиз ҳодисанинг олдини олишда ёрдам берган фуқароларга Наманган вилояти ФВБ раҳбарияти ўз миннатдорлигини билдирган.
Аввалроқ Наманганда чўкаётган аёлни қутқарган миллий гвардия ходимининг ўзи сувда оқиб кетиб, бедарак йўқолгани ҳақида хабар берилган эди. Самарқандда эса Пастдарғом тумани Чархин шаҳарчасидан оқиб ўтувчи Дарғом каналига тушиб кетган 20 яшар қизни қутқариб қолган Самарқанд Иқтисодиёт ва сервис институти талабалари тақдирланган эди.
Маълумот учун, Қашқадарёда Миллий гвардия ходимлари Қарши шаҳридаги Ислом Каримов кўчасидан оқиб ўтувчи Қашқадарё дарёсига сакраб, ўз жонига қасд қилмоқчи бўлган икки фуқаронинг ҳаётини сақлаб қолган эди. Самарқандлик йигит эса сувда чўкаётган 3 яшар болакайни қутқариб қолганди. Хоразмлик 21 ёшли Ёқуббой Дўсматов сувга чўкаётган аёлнинг ҳаётини қутқариб қолган. Бу жасорати учун Ёқуббой Дўсматов ФВБга ишга таклиф қилинди. Бироқ бу вақтда у Россияга ишлашга жўнаб кетган эди. Россияга боргач, йигитнинг ўзи ҳам қийин вазиятга тушиб қолди.
Изоҳ (0)