Давлат солиқ қўмитасининг собиқ раиси Ботир Парпиев Президент фармони билан янги лавозимга тайинланди. «Gazeta.uz»нинг хабар беришича, у янги ташкил этилган Маҳалла ва оилани қўллаб-қувватлаш вазирлигида вазир ўринбосари бўлди.
Лавозимга тайинлангунга қадар Ботир Парпиев 2018 йилнинг май ойидан буён Фуқароларнинг ўзини ўзи бошқариш органлари фаолиятини мувофиқлаштириш бўйича Республика Кенгаши раисининг Кексалар ва фахрийлар ишлари бўйича ўринбосари лавозимида ишлаб келаётган эди.
Ботир Парпиев 1946 йилда Андижон вилоятида, милиция генерал майори Раҳмат Парпиевнинг оиласида туғилган. 1992—1996 йилларда Андижон вилояти ИИБ бошлиғи, 1996—1998 йилларда Ўзбекистон ИИВ Ёнғин хавфсизлиги бош бошқармаси бошлиғи, 1998—2002 йилларда Ўзбекистон ички ишлар вазири ўринбосари, 2002 йилнинг июнь ойидан декабрь ойигача Ўзбекистон фавқулодда вазиятлар вазири, 2002—2004 йилларда Ўзбекистон Давлат божхона қўмитаси раиси, 2004—2018 йилларда эса Давлат солиқ қўмитаси раиси лавозимида ишлаган.
Шунингдек, 2018 йилга қадар Ўзбекистон Таэквондо WTF ассоциацияси президенти лавозимида ҳам фаолият юритган.
Эслатиб ўтамиз, Олий Мажлис Қонунчилик палатасининг 18 февраль, сешанба куни, ўтказилган навбатдаги мажлисида Ўзбекистон Президентининг «Жамиятда ижтимоий-маънавий муҳитни соғломлаштириш, маҳалла институтини янада қўллаб-қувватлаш ҳамда оила ва хотин-қизлар билан ишлаш тизимини янги даражага олиб чиқиш чора-тадбирлари тўғрисида»ги фармонини тасдиқлаш масаласи кўриб чиқилганди.
Президентнинг мазкур фармони билан Ўзбекистон Маҳалла ва оилани қўллаб-қувватлаш вазирлиги ташкил этилиши маъқулланган, янги тузилма раҳбари этиб Раҳмат Маматов номзоди маъқулланганди. Ички ишлар вазири ўринбосари Азиз Икромовга эса унинг ўринбосари вазифасини бажариш юклатилди.
Изоҳ (0)