«Бўстон» санаториясида 18 февраль куни коронавирус карантини якунланиб, Хитойдан келган 294 нафар фуқаро уйларига кузатилгани хабар берилган эди. Таҳлил натижаларида бирор фуқарода коронавирус инфекцияси йўқлигини аниқланган.
Турли мақсадларда Хитойда сафарда бўлган жами 584 нафар фуқаро жорий йилнинг 4—6 февраль кунлари учта чартер рейс орқали мамлакатга олиб келинганди. Уларнинг 459 нафари эркак ва 125 нафари хотин-қизлардир.
Бугун, 19 февраль куни, ушбу даволаш муассасасига жойлаштирилган яна 84 нафар фуқаро карантин муддати якунига етиши муносабати билан уйига кузатилди. Уларнинг ҳам бирортасида коронавирус инфекцияси аниқланмади.
Кузатиш маросимида иштирок этган «Xabar.uz» мухбири карантин муддатидан чиққан фуқаролар билан суҳбатда бўлди.Икки ҳафта айтишгагина осон, Хитойда ўғлим Ҳожиакбар ва келиним Рушона таҳсил олади. Ваҳимали гаплар, албатта, одамнинг ҳаловатини ўғирлайди. Кеча-ю кундуз ташхислари яхши чиқсин, дея ният қилиб ўтирдик. Мана бугун болаларимни соғ-саломат бағримга босаётганимдан жуда бахтиёрман. Улар мен учун қайтадан туғилган кун бугун.Назира Ғуломова
Албатта, бутун дунё бу эпидемия ҳақида тўхтовсиз бонг ураётган бир пайтда фарзандинг ҳам ўша ерда эканлиги она сифатида қалбингизни безовта қилади. Ўғлимга, аввало, шифокор сифатида ўзини қандай ҳимоялаш кераклиги бўйича тавсиялар бердим. Ўзбекистонга қайтгач, яна нималарга эътибор бериш кераклигини тез-тез эслатиб, ўзини қандай ҳис қилаётганини суриштириб турдим. Айтмоқчиманки, ҳеч қандай касаллик бесабаб тарқалмайди. Ҳар бир инсон, аввало, болаликдан тиббий маданиятини шакллантириб бориши лозим. Оддийгина гигиеник қоидаларга риоя қилиш — бемор ҳолида жамоат жойларида ниқобсиз юрмаслик, қўлни совунлаб ювиш аслида одамдан кўп меҳнат талаб қилмайди. Озгина қунт ва ҳафсала керак.Ҳилола Рустамова, онколог шифокор
Хитойда яшаётган, бош олиб кетишга бошқа бошпанаси бўлмаган хитойликларнинг ўзлари бу мусибатни қандай кутиб олишганига ҳам тўхтаб ўтилди.
Бўлғуси журналист сифатида ва у ёқдаги вазият билан бу ердаги вазиятни таққослаган ҳолда шуни айтишим мумкинки, Хитойда яшаётганлар бизнинг юртдошларимиздек ваҳимага ёки тушкунликка тушиб қолишгани йўқ. Мен яшаган провинциядагилар ҳам кундалик оддий ҳаётларини давом эттиришмоқда. Мени ҳайрон қолдиргани бизда ортиқча ваҳима кўтарилганлигидир. Тўғри, бу эпидемия баъзи инсонларни ҳаётдан олиб кетаётгани, бутун дунё иқтисодиётига зарар етказаётгани ачинарли, лекин бундай вазиятда хотиржам бўлиш, ёлғон миш-мишларни тарқатиш вазиятни янада чигаллаштиради. Мана шу ҳолат орқали яна бир нарсани англаб етдим. Ҳамма хабарларга ҳам ишонавериш ва хайп учун ортиқча ваҳима кўтариб ахборот тарқатиш яхши эмас экан. Яна бир гап, биз — Хитойда ўқиётган талабалар бир-биримизга эътиборсиз эдик. Мусибат бизни бирлаштирди. Хитойда ўқиётган талабалар ижтимоий тармоқларда гуруҳ очиб, бир-биримиздан хабарлашиб турибмиз, бу ерда ҳам кўпчилик билан дўстлашдик.Шунингдек, шифокор ва ҳамширалар бундай таҳликали вазиятда ўзларини қандай ҳис қилганини ҳам сўзлаб беришди.Отажон Эсанбаев, Навоий вилояти
Хитойдан талабаларнинг келиши учун мана шу ерда тайёргарлик кўрилаётган пайтдаёқ нафақат шифокорлар, балки биз ҳамширалар ҳам икки ҳафта ҳеч қаёққа чиқмаслигимиз ҳақида маълумотга эга эдик. Кимнинг чекига шу ерда қолиш, улар билан бирга бир ҳаводан нафас олиш тушган бўлса, бажонидил рози бўлдик. Улар билан биринчи кунданоқ ҳеч қандай қўрқувларсиз мулоқотга киришдик. Бир кунда икки марталаб текширдик. Албатта, бизни масъул идоралар, аввало, Соғлиқни сақлаш вазирлиги барча ҳимоя воситалари билан таъминлади. Бугун уларга жавоб берилганидан, ота-оналар қариндошлари дилидаги хавотир барҳам топганидан хурсандмиз. Улар бизга ўз фарзандларимиздек азиз бўлиб қолишди. Юртдошларимга айтмоқчи бўлганим ваҳимага ўрин йўқ. Аммо хотиржам бўлишга ҳам ҳаққимиз йўқ. Яъни ҳар бир инсон соғлом турмуш тарзига риоя қилиши шарт.Зоҳида Раҳимова, ҳамшира
Изоҳ (0)