Davlat soliq qo‘mitasining sobiq raisi Botir Parpiyev Prezident farmoni bilan yangi lavozimga tayinlandi. “Gazeta.uz”ning xabar berishicha, u yangi tashkil etilgan Mahalla va oilani qo‘llab-quvvatlash vazirligida vazir o‘rinbosari bo‘ldi.
Lavozimga tayinlangunga qadar Botir Parpiyev 2018-yilning may oyidan buyon Fuqarolarning o‘zini o‘zi boshqarish organlari faoliyatini muvofiqlashtirish bo‘yicha Respublika Kengashi raisining Keksalar va faxriylar ishlari bo‘yicha o‘rinbosari lavozimida ishlab kelayotgan edi.
Botir Parpiyev 1946-yilda Andijon viloyatida, militsiya general-mayori Rahmat Parpiyevning oilasida tug‘ilgan. 1992—1996-yillarda Andijon viloyati IIB boshlig‘i, 1996—1998-yillarda O‘zbekiston IIV Yong‘in xavfsizligi bosh boshqarmasi boshlig‘i, 1998—2002-yillarda O‘zbekiston ichki ishlar vaziri o‘rinbosari, 2002-yilning iyun oyidan dekabr oyigacha O‘zbekiston favqulodda vaziyatlar vaziri, 2002—2004-yillarda O‘zbekiston Davlat bojxona qo‘mitasi raisi, 2004—2018-yillarda esa Davlat soliq qo‘mitasi raisi lavozimida ishlagan.
Shuningdek, 2018-yilga qadar O‘zbekiston Taekvondo WTF assotsiatsiyasi prezidenti lavozimida ham faoliyat yuritgan.
Eslatib o‘tamiz, Oliy Majlis Qonunchilik palatasining 18-fevral, seshanba kuni, o‘tkazilgan navbatdagi majlisida O‘zbekiston Prezidentining “Jamiyatda ijtimoiy-ma’naviy muhitni sog‘lomlashtirish, mahalla institutini yanada qo‘llab-quvvatlash hamda oila va xotin-qizlar bilan ishlash tizimini yangi darajaga olib chiqish chora-tadbirlari to‘g‘risida”gi farmonini tasdiqlash masalasi ko‘rib chiqilgandi.
Prezidentning mazkur farmoni bilan O‘zbekiston Mahalla va oilani qo‘llab-quvvatlash vazirligi tashkil etilishi ma’qullangan, yangi tuzilma rahbari etib Rahmat Mamatov nomzodi ma’qullangandi. Ichki ishlar vaziri o‘rinbosari Aziz Ikromovga esa uning o‘rinbosari vazifasini bajarish yuklatildi.
Izoh (0)