Қашқадарё вилоятининг Чироқчи туманида икки синфдошнинг ўзаро жанжали улардан бирининг ўлими билан якунланди. Вилоят прокуратураси қотиллик қандай содир этилгани ҳақида маълумот берди.
Қайд этилишича, Чироқчи тумани Чиял жамоа хўжалигидаги анъаналарга кўра, ҳар йилги Наврўз байрами арафасида қишлоқ аҳолиси томонидан байрам тадбирлари ўтказиш ташкиллаштирилиб келинган.
2020 йилги Наврўз байрамини шу қишлоқда 1986 йилда туғилган йигитлар томонидан пул йиғишиб, байрам қилиб бериш, байрам тадбирига таниқли эстрада хонандаларидан таклиф этиш ва бошқа харажатларини кўтариш лозим бўлган.
Айбланувчи Н.О. ҳам синфдошлари билан бирга Наврўз байрамининг ташкилий масалалари ҳақида маслаҳат қилиш учун йиғилиб, йиғинда кўп миқдорда спиртли ичимлик истеъмол қилган.
Маслаҳат ошида синфдоши марҳум С.Я. билан суҳбат давомида байрамда ошпаз танлаш масаласида ўзаро оғзаки тортишиб қолган.
Айбланувчи Н.О. уйига қайтганидан сўнг марҳум С.Я. билан телефон орқали яна тортишиб, ўзаро бир-бирларини ҳақорат қилган.
Шундан сўнг Н.О ўзининг яшаш хонадонидан ошхона пичоғини олиб, марҳумнинг яшаш хонадонига борган, уни уйидан тополмагач яшаш уйига қайтишида қишлоқдаги кўприк устида марҳум С.Я.ни учратиб қолиб, ёнидаги пичоқни С.Я.га санчиб уни қасддан ўлдирган.
Мазкур ҳолат юзасидан 14 февраль куни Чироқчи тумани прокуратураси томонидан Жиноят кодексининг 97-моддаси (Қасддан одам ўлдириш) 1-қисми билан жиноят иши қўзғатилиб, ҳозирда тергов ҳаракатлари олиб борилмоқда.
Изоҳ (0)