Ички ишлар вазирининг жамоат тартибини сақлаш бўйича ўринбосари Азизбек Икромов янги лавозимга тайинланди, деб хабар бермоқда ИИВ матбуот хизмати.
Бугун, 19 февраль куни, Вазирлар Маҳкамасида ўтказилган йиғилишда унга янги ташкил этилган Маҳалла ва оила масалалари вазирлигига вазир ўринбосари вазифасини бажариш юклатилди.
Қайд этилишича, у бир вақтнинг ўзида Ички ишлар вазири ўринбосари лавозимидаги фаолиятини ҳам давом эттиради. Азиз Икромов, шунингдек, Ўзбекистон Регби федерацияси вице-президенти ҳамдир.
Азиз Икромов бунгача Мудофаа вазири ўринбосари лавозимида ҳам фаолият юритган. У 2019 йилнинг ноябрь ойидан бошлаб Ички ишлар вазири ўринбосари лавозимида ишлаб келмоқда.
Эслатиб ўтамиз, Олий Мажлис Қонунчилик палатасининг 18 февраль куни ўтказилган навбатдаги мажлисида Ўзбекистон Президентининг «Жамиятда ижтимоий-маънавий муҳитни соғломлаштириш, маҳалла институтини янада қўллаб-қувватлаш ҳамда оила ва хотин-қизлар билан ишлаш тизимини янги даражага олиб чиқиш чора-тадбирлари тўғрисида»ги фармонини тасдиқлаш масаласи кўриб чиқилганди.
Президентнинг мазкур фармони билан Ўзбекистон Маҳалла ва оилани қўллаб-қувватлаш вазирлиги ташкил этилиши маъқулланган, янги тузилма раҳбари этиб Раҳмат Маматов номзоди маъқулланганди.
Изоҳ (0)