Андижонлик Жасурбек Ҳамроқулов Андижон шаҳар 6-сон ИИБ профилактика инспектори Сардор Абдуманнопов томонидан 2019 йил 11 сентябрь кун ИИБ биносида калтаклангани ҳақида хабар берилган эди.
Ўзбекистон Ички ишлар вазирлиги мазкур ҳолат юзасидан маълумот берган эди. Вазирлик томонидан маълум қилинишича, Жасурбек Ҳамроқулов 2019 йилнинг 11 сентябрида соат чамаси 22:30 да Андижон шаҳри Нодира кўчасида жойлашган «Камелот» кафеси олдида жанжал чиқарган. Воқеа жойига етиб келган ИИБ профилактика инспектори Сардор Абдуманнопов уни тинчлантиришга уринган пайтида фаол қаршиликка учраган. Қайд этилишича, шундан сўнг фуқаро Жасурбек Ҳамроқулов ҳудудий ички ишлар бўлимига олиб келиниб, белгиланган тартибда рўйхатдан ўтказилган. Маст ҳолатда бўлган Жасурбек Ҳамроқулов бу ерда ҳам ходимларга фаол қаршилик кўрсатган.
Мазкур ҳолат Андижон вилоятининг прокуратура органлари томонидан атрофлича ўрганиб чиқилиб, Жасурбек Ҳамроқуловга нисбатан Ўзбекистон Республикаси Жиноят кодексининг 219-моддаси 1-қисми (Ҳокимият вакилига ёки фуқаровий бурчини бажараётган шахсга қаршилик кўрсатиш) ва 277-моддаси 2-қисми (Безорилик) билан айб эълон қилинган. Ҳозирда жиноят иши Ўзбекистон Республикаси Жиноят процессуал кодексининг 388-моддаси тартибида суд муҳокамасига юборилган.
Бош прокуратура ҳам мазкур ҳолат юзасидан хабар берган ва очилган жиноий иш тафсилотларини маълум қилган. Унга кўра, ИИБ профилактика инспектори Жасурбек Ҳамроқуловни тинчлантиришга уринган пайтда у ИИБ ходимига бўйсунишни хоҳламаган. Жасур Ҳамроқулов инспекторнинг қонуний талабларини бажаришдан бўйин товлаб, унга фаол қаршилик кўрсатган ҳамда ходимнинг эгнида бўлган хизмат кийимидаги погонини юлиб олган.
2020 йилнинг 9 январь куни Жасур Ҳамроқуловга нисбатан мазкур жиноят иши юзасидан Жиноят кодексининг 219-моддаси 1-қисми, 277-моддаси 2-қисми «г» банди билан айблов эълон қилиниб, унга нисбатан муносиб хулқ-атворда бўлиш ҳақида тилхат эҳтиёт чораси қўлланилган.
Юқоридагиларга асосан Андижон шаҳар прокуратураси томонидан ишнинг инспектор Сардор Абдуманноповга тегишли бўлган қисми тергов муҳокамасидан чиқариб тугатилган. Мазкур жиноят иши 2020 йил 11 январь куни мазмунан кўриб чиқиш учун айблов хулосаси билан Жиноят ишлари бўйича Андижон шаҳар судига юборилган.
Кейинроқ Ўзбекистон Олий суди ҳам мазкур ҳолат бўйича олиб борилаётган иш юзасидан маълумот берган эди.
Ўзбекистон Олий суди томонидан маълум қилинишича, 7 февраль, жума куни, «Севимли» телеканали орқали фуқаро Жасурбек Ҳамроқулов ишига оид суд жараёни бошлангани ҳақида кўрсатув намойиш этилган. Кўрсатувда муаллиф, «Севимли» телеканалининг Андижон вилояти бўйича мухбири Г.Рустамова томонидан журналистларнинг суд залига қўйилмаганлиги таъкидланган. Олий суд томонидан қайд этилишича, «Севимли» телеканали орқали намойиш этилган телелавҳада таъкидланганидек, 7 февраль куни бўлиб ўтган биринчи суд мажлисига журналистларнинг киритилмагани масаласи ўрганилганида, суд раисига суд жараёнини тасвирга олиш, журналистларнинг иштирок этиши бўйича ёзма мурожаат ёки илтимоснома келиб тушмаган.
Мазкур воқеалар ортидан ҳолатнинг асосий қаҳрамони бўлган Жасурбек Ҳамроқулов видеомурожаат билан чиқди ва ИИБ ходимларидан узр сўради.
Жасурбек Ҳамроқуловнинг айтишича, бир неча кун аввал «Севимли» телеканалида унинг ички ишлар идоралари ходимларидан калтак еганлиги ҳақида эфирга узатилган лавҳада воқеалар бўрттириб кўрсатилган.
Унинг маълум қилишича, мазкур ҳолат юзасидан прокуратура томонидан дастлабки тергов ҳаракатлари олиб борилган ва ички ишлар ходимлари ноқонуний ҳаракат қилмаганлигини аниқланган. Мазкур иш судга юборилган ва айни пайтда суд жараёни кетмоқда.
Жасурбек Ҳамроқулов «Севимли» телеканали мазкур ҳолатни бўрттириб юборгани учун ички ишлар идоралари ходимларидан узр сўраган. Шунингдек, у мазкур видеони олишга уни ҳеч ким мажбур қилмагани ва тазйиқ ўтказмаганини айтган.
2018 йилда Андижон вилояти Бўз туманида ИИБ ходимидан калтак еган йигитнинг отаси ИИБ ходимини эмас, балки бу воқеани видеога олган шахсни жазолашни сўраган эди.
Изоҳ (0)