Янги таҳрирдаги Солиқ кодексига асосан, 2020 йилнинг 1 январидан бошлаб санъаткорлар ҳам даромад солиғи тўлайдиган бўлди. Бу ҳақда 17 февраль, душанба куни, АОКАда Давлат солиқ қўмитаси томонидан ўтказилган матбуот анжуманида маълум қилинди, дея хабар бермоқда «Дарё» мухбири Миролим Исажонов.
Санъаткорлар илгари фақат лицензия олиш пайтида давлат божи тўлар эди. Тадбиркор сифатида рўйхатдан ўтгач, солиқ тўлашдан озод бўларди. Жорий йилдан бошлаб, улар тўлайдиган давлат божи тўрт баробаргача камайди ва солиқ тўлаш мажбурияти жорий қилинди. Эндиликда йиллик даромади 100 миллион сўмгача бўлган хонандалар қатъий солиқ ёки ўз ихтиёрига кўра, декларация асосида даромад солиғини тўлайди. Агар маблағи 100 миллион сўмдан зиёд бўлса, улар айланмадан олинадиган солиқ тўлайди. Даромад бир миллиард сўмдан ортса, фойда солиғи ва ҚҚС тўлаш талаб этилади.Тадбирда таъкидланишича, 2019 йил якунига қадар концерт-томоша фаолияти билан шуғулланувчи бир нафар ижрочи томонидан йилига ўртача 7 миллион сўм (ижрочиларнинг рейтинг гуруҳига қараб 5,6 миллион сўмдан 46,2 миллион сўмгача) давлат божи тўланган. Лицензия эса уч ойдан беш йилгача берилган. Жорий йилдан бошлаб лицензия муддати қатъий бир йил этиб белгиланди.Мабодо, хонанда ўз хоҳиши билан декларация асосида солиқ тўлайдиган бўлса, йиллик барча даромад ва харажатлари ҳисобини олиб бориши керак. Масалан, санъаткор йил мобайнида кўрсатган хизмати орқасидан 100 миллион сўм даромад топди, дейлик. У қўшиқ ёзиши, клип олиши, созандалари ва бошқа ижоди билан боғлиқ харажатларига сарфлаган пулларини ҳисоб-китоб қилади. Унга лицензия олаётган вақтда тўлаган давлат божини ҳам қўшади. 100 миллион сўмдан харажатларга кетган пулини айириб ташлайди ва охирида қанча маблағ қолса, шундан 12 фоизини даромад солиғига тўлайди.
Бу масала бўйича «Ўзбекконцерт»да Солиқ қўмитаси, Молия вазирлиги, Президент администрацияси билан биргаликда йиғилиш ўтказилди. Халқ артистларидан то ёш хонандаларгача қатнашган мажлисда янги тартиб муҳокама қилинди. Айрим масалаларга аниқлик киритиш устида иш олиб боряпмиз. Лекин ушбу норманинг йўлга қўйилиши хонандалар учун катта муаммо эмас. Бу борада улардан эътирозлар ҳам эшитмадик. Айни пайтда «Ўзбекконцерт» билан биргаликда солиқ тўлаш механизмини ишлаб чиқяпмиз.
Фазлиддин Умаров, Давлат солиқ қўмитаси раиси ўринбосари
Лицензия олингандан сўнг ҳар ойда базавий ҳисоблаш миқдорининг бир баравари миқдорида тўланадиган пенсия бадали (ижтимоий солиқ) миқдори (223 минг сўм) ўзгаришсиз сақлаб қолинди.
Изоҳ (0)