Туркия президенти Ражаб Тоййиб Эрдўғон Покистонга ташриф чоғида унга ҳамроҳлик қилаётган журналистларга Россия Ливиядаги урушни «олий даражада» бошқараётганини маълум қилди.
Россия ташқи ишлар вазири ўринбосари Михаил Богданов Эрдўғоннинг баёноти юзасидан «Интерфакс»га изоҳ бераркан, буни «ҳақиқатга ва мамлакатдаги ҳақиқий аҳволга мутлақо зид» деб атади.
«У буни қаердан олганини, унга бундай ахборот қаердан борганини билмайман», — дея қўшимча қилди Богданов.
Туркия президенти аввалроқ Ливияда «Вагнер» ҲҲКнинг икки мингдан ортиқ ёлланма жангчилари борлигини маълум қилганди. Россия президенти Владимир Путин, ўз навбатида, агар Ливияда «Вагнер» ҲҲК ёлланма жангчилари бўлса ҳам, улар Россия манфаатларини ҳимоя қилмаслигини айтиб ўтган эди.
Туркия январь ойида Ливияга ҳарбий мутахассисларни юборишга қарор қилганди; Эрдўғоннинг таъкидлашича, бу қарор Ливиянинг Фоиз Сараж бошчилигидаги халқаро миқёсда тан олинган ҳукуматини қўллаб-қувватлаш мақсадида қабул қилинган. Ливияда ҳокимиятни тўлиқ эгаллаш Саражнинг асосий рақиби, норасмий маълумотларга кўра, Россиядан кўмак олиб турган фелдмаршал Халифа Хафтар ҳисобланади. Россия расмийлари ушбу маълумотларни расман рад этиб келмоқда.
Изоҳ (0)