Ўзбекистон ҳам Евроосиё иқтисодий иттифоқи (ЕОИИ)га, ҳам Жаҳон савдо ташкилоти (ЖСТ)га аъзо бўлиш бўйича музокаралар олиб бормоқда. Бу ҳақда Ўзбекистон ташқи ишлар вазири ўринбосари Илҳом Неъматов 14 февраль куни бўлиб ўтган матбуот анжуманида маълум қилди, дея хабар бермоқда «Gazeta.uz».
Унинг сўзларига кўра, янги халқаро ташкилотларга қўшилиш ҳақида қарор қабул қилиш олдидан ҳукумат барча афзаллик ва камчиликларни ўрганиб чиқади.
«Ўзбекистон мустақилликка эришганидан буён 120 та халқаро ташкилот, молиявий институтларнинг аъзосига айланди. Аъзо бўлишдан аввал, албатта, бунинг ижобий ва салбий жиҳатлари ўрганилган. Ўрганишлардан сўнг, Ўзбекистон манфаатларидан келиб чиқиб, мамлакат аъзо бўлиб кирган. Евроосиё иқтисодий иттифоқи ва Жаҳон савдо ташкилотига аъзо бўлиб киришни таққослашнинг кераги йўқ, боиси бугун ҳар икки ташкилотга аъзо бўлиш бўйича музокаралар олиб борилмоқда, ўрганишлар ўтказилмоқда», — деди у.
Илҳом Неъматовнинг таъкидлашича, ЖСТга аъзо бўлиш масаласи устида инвестициялар ва ташқи савдо вазири ўринбосари бошчилигидаги махсус ишчи гуруҳ иш олиб бормоқда.
«ЖСТга, биринчи галда, ҳар томонлама ҳимоя борасида келишиб олганимиздан кейингина аъзо бўламиз. Евроосиё иқтисодий иттифоқи борасида ҳам худди шундай», — дея қайд этиб ўтди ТИВ раҳбари биринчи ўринбосари.
Дипломат Президент Шавкат Мирзиёевнинг сўзларидан иқтибос келтириб, «ЕОИИга аъзо бўлиш халқ манфаатларига мувофиқ келиши лозим»лигини таъкидлади.
«Ўрганишлар натижаси янги парламент томонидан қарор қабул қилиш учун кўриб чиқилади. Президент шундай деган», — деди у.
Шавкат Мирзиёев январь ойидаги чиқишида интеграцион бирлашмаларга қўшилиш Ўзбекистон мустақиллиги йўқотилишини англатмаслигини таъкидлаган эди. ЕОИИга аъзо бўлиб кириш ҳақидаги муҳокамаларга жавоб бераркан, давлат раҳбари Ўзбекистон кузатувчи мақомини кўриб чиқаётганини маълум қилган эди.
2019 йилнинг ноябрь ойида эса ташқи ишлар вазири Абдулазиз Комилов Ўзбекистонда «ЖСТга аъзо бўлиб кириш бўйича бутун музокаралар жараёнини имкон қадар тезроқ якунлашга интилиш» борлигини таъкидлаб ўтганди.
Изоҳ (0)