Сирдарёнинг Боёвут туманида қиморхона ташкил этган фуқароларнинг фаолиятига чек қўйилди, деб хабар бермоқда Бош прокуратура матбуот хизмати.
Департаментнинг Сирдарё вилоят бошқармаси томонидан бошқа ҳуқуқни муҳофаза қилувчи органлар билан ҳамкорликда ўтказилган тезкор тадбирида фуқаро М.М. ва бошқалар Боёвут туманидаги эски трактор парки биносида қонунга хилоф равишда қимор ва таваккалчиликка асосланган хўроз уриштириш ўйинини ташкил этиб, ушбу ўйинга фуқароларни жалб қилган ҳолда ўйинга кириш учун ҳар бир кишидан маълум миқдорда пул йиғиб олиб, қиморхона ташкил этгани аниқланган.
Шунингдек, М.М.нинг турмуш ўртоғи М.Ш. номига берилган фаолият тури сифатида «Миллий ўйинлар ташкиллаштириш» деб кўрсатилган гувоҳнома аслида «Ташкилотлар учун қишлоқ хўжалиги маҳсулотлари тайёрлаш хизмати» учун берилган бўлиб, М.М. томонидан қиморхона ташкил қилиш мақсадида сохталаштирилганлиги маълум бўлган.
Ҳолат юзасидан фуқаро М.М. ва бошқаларга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Жиноят кодексининг 278-моддасига кўра, Ўзбекистонда қимор ва таваккалчиликка асосланган бошқа ўйинларни ташкил этиш ҳамда ўтказиш етти йилгача озодликдан маҳрум қилиш билан жазоланади.
Аввалроқ Самарқанднинг Оқдарё туманидаги Маҳалла қишлоғида хўрозлар жанги учун ташкил қилинган арена фаолиятига чек қўйилгани, уни ташкил этган шахс эса қамоққа олингани ҳақида хабар берилган эди.
Изоҳ (0)